Хаҥалас улууһугар олус интэриэһинэй көҕүлээһини киллэрдилэр. Ол курдук, хороҕор муостаахтар уонна сыспай сиэллээхтэр суол быһылааныгар түбэспэттэрин туһугар, улуус дьаһалтата уоту тэйитэр элэмиэннэри кэтэрдэр туһунан быһаарыныыны ылынна.
Уоту тэйитэр лиэнтэлэр, ошейниктар, кырааскалар дьиэ кыыла хараҥа кэмҥэ суол саахалыгар түбэһиитин аччатыахтаах.
Балаҕан ыйын 5 күнүгэр улуус дьаһалтата, ветеринария салалтата уонна ГИБДД бу боппуруоһу дьүүллэстилэр. Ол түмүгүнэн Төхтүр, Өктөм, Улахан-Аан, Нөмүгү нэһилиэктэригэр сүөһүлэргэ уонна сылгыларга уоту тэйитэр элэмиэннэри кэтэрдэр туһунан быһаарыныыны ылыннылар.
Улуустааҕы ГИБДД көрдөрүүтүнэн бүтэһик үс сылга сүөһүлэр, сылгылар кыттыгастаах 34 суол саахала тахсыбыт.
