Киирии

Киирии

Күннээх Күндээдэ нэһилиэгэр алтынньы 8 күнүгэр бэлиэ түгэн буолла. 1954 сылтан үлэлии турар «Кэнчээри» уһуйаан киэҥ тэлгэһэтигэр сабыс саҥа, аныгылыы тутуулаах, 50 миэстэлээх дьэрэкээн көстүүлээх таас дьиэ тутуллан, олохтоохтор, төрөппүттэр, уһуйаан үлэһиттэрэ баҕа санаалара туолан, үөрүү өрөгөйүн биллилэр. Ыраахтан-чугастан ыалдьыттар муһуннулар.

«Аар-Айыы» итэҕэлин XI кэрдиистээх алгысчыта, үрдүкү категориялаах норуот эмчитэ, норуоттар икки ардыларынааҕы ЮНЕСКО иһинэн норуоттар мэдиссиинэлэрин магистра, Таркаайы нэһилиэгин бочуоттаах олохтооҕо, үлэ бэтэрээнэ Алиса Михайловна Иннокентьева сахалыы сиэринэн-туомунан, алгыһынан аста.

СӨ култууратын туйгуна Г.П.Степанова салайар Арассыыйа образцовай «Кэскил» оҕо үҥкүү ансаамбыла чороонноох үҥкүүнү толордулар.
«Ньурба оройуона» МО баһылыга Алексей Иннокентьев, СӨ Ил Түмэн Судаарыстыбаннай мунньаҕын вице-спикерэ Антонина Григорьева, «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев, СӨ үөрэх уонна наука министиэристибэтин ресурснай хааччыйыы Киинин дириэктэрэ Василий Петров, улуустааҕы үөрэҕирии управлениетын салайааччыта Алевтина Аргунова, уһуйаан салайааччыта Венера Степанова аалай кыһыл лиэнтэни үөрүүлээх быһыыга-майгыга быстылар.

Дьыссаат дьиэтин болдьоммут бириэмэтигэр ситэрэн-хоторон үлэҕэ киллэрбит «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев символическай дьиэ күлүүһүн уһуйаан салайааччытыгар Венера Ивановнаҕа үөрүүлээх түгэҥҥэ туттарда.

Салгыы оҕо уһуйаанын саалатыгар ыалдьыттары, мустубут дьону ыҥырдылар. «Күндээдэ нэһилиэгэ» МТ баһылыга Юрий Васильев эҕэрдэ тыл эттэ, тутааччыларга, чуолаан, улуус баһылыгар А.М.Иннокентьевка, ИСУ салайааччытыгар М.С. Семеновка, үөрэҕирии управлениетын салайааччытыгар А.П.Аргуноваҕа махтанарын биллэрдэ. Оройуон Сэбиэтин бэрэссэдээтэлэ Сергей Евсеев, кэлбит ыалдьыттар эҕэрдэ тыл эттилэр, дьоро быһыыга-майгыга уһуйааҥҥа үлэлээн ааспыт бэтэрээннэргэ, уо.д.а. эҕэрдэ, махтал суруктары туттардылар.

Уһуйаан кырачаан иитиллээччилэрэ үөрүүлэрин биллэрэн хоһоон аахтылар, ырыа ыллаатылар, үҥкүү толордулар.

Антонина СЕМЕНОВА, ulus.media

Тарҕат:

Комментарии

Защитный код Обновить