Киирии

Киирии

Алтынньы 17 күнүгэр Горнай улууһун Дьиикимдэ нэһилиэгэр, “Култуура” национальнай бырайыак чэрчитинэн тутуллубут саҥа култуура дьиэтин арыллыыта буолуоҕа. Бу туһунан СӨ култуураҕа уонна духуобунай сайдыыга министиэристибэтин пресс-сулууспата иһитиннэрэр.

Саҥа эбийиэк тутуутугар федеральнай бүддьүөттэн 75,4 мөл солк уонна өрөспүүбүлкэтээҕи бүддьүөттэн 6,3 мөл солк үп көрүллүбүт.

Икки мэндиэмэннээх саҥа дьиэ 125 миэстэлээх, саала үрдэ акустическай оттон муостата амфитыйаатырга курдук үрдүк буолар. Ону таһынан, үлэһиттэр кэбиниэттэрэ, көстүүмнэри уонна декорациялары харайар хостордоох. Киириигэ доруобуйаларыгар хааччахтаах дьоҥҥо аналлаах пандус уонна туалекка киирэр аан кээмэйэ улахан буолар. Тутуу бэдэрээтчитэ “Саха строй 2002” тэрилтэ.

Саҥа эбийиэккэ мусуой уонна хартыына галереята көһөн кэлиэхтэрэ. Билигин 1982 сыллаах хаарбах туруктаах дьиэҕэ үлэлии олороллор. Мусуойга 7 тыһ тахса экспонат баар. Ол курдук, биир дойдулаахтара Семен уонна Софрон Даниловтар туттубут маллара-саллара баар. Оттон хартыына галереятыгар биир дойдулаахтара, академик Афанасий Осипов 119 хартыыната баар.

Дьиикимдэ нэһилиэгэ 700-кэ нэһилиэнньэлээх. Олортон 170 оҕолор. Култуура дьиэтигэр 13 айар түмсүү уонна 12 куруһуок үлэлииллэр. Ону таһынан, норуодунай тыйаатыр баар. Ону нэһилиэк олохтооҕо Владимир Егоров салайар. Кини ОДьКХ операторынан үлэлиир. Мытаах нэһилиэгин баһылыга Иван Петров этэринэн, саҥа култуура дьиэтин 2000 сыллар саҕаланыыта, урут баһылыгынан үлэлээбит Степан Пахомов көҕүлээһининэн туттара сатаабыттар да, куоҥкуруһу ааспатахтар.

News.Ykt.Ru

Тарҕат:

Комментарии

Защитный код Обновить