Бүгүн Булуҥ оройуонун үөрэнээччилэригэр үөрэх күнэ Арассыыйа гимнин толоруунан саҕаланна. Оройуоннааҕы дьаһалта иһитиннэрбитинэн, тоҕус оскуолаҕа үөрэх күнэ мантан инньэ дойду гимнин толоруунан саҕаланар буолуоҕа.
Ону таһынан, саҥа көҕүлээһин хас биирдии оҕо патриотическай иитиитин күүһүрдүөҕэ диэн бэлиэтииллэр. Санатар буоллахха, сэтинньи 20 күнүгэр Ил Дархан Айсен Николаев, “Мы – будущее России!” диэн оҕолору, ыччаты өй-санаа, майгы-сигили өттүнэн уонна патриотическай иитиигэ туһуламмыт ыйаахха илии баттаабыта. Ол ыйаах быһыытынан, өрөспүүбүлүкэ хас биир оскуолатыгар үөрэнээччилэр уонна учууталлар Арассыыйа гимнин толорор буолуохтара.
