Ахсынньы 2-8 күннэригэр Москубаҕа, Уһук Илиҥҥи эрэгийиэннэр күннэрин чэрчитинэн, номнуо үһүс төгүлүн дьаармарка ыытылынна.
Быйыл 11 эрэгийиэн бары кыттыыны ыллылар. Хас биирдиилэрэ бэйэлэрин бородууксуйаларын, сувенирдарын атыыга таһаардылар. Ону таһынан, бастыҥ кэллэктииптэр кэнсиэр көрдөрдүлэр, уран тарбахтаах уустар маастар-кылаастары ыыттылар. Дьаармаркаҕа 25 тыһ кэриҥэ киһи сылдьыбыт. Дьон ордук балык бородууксуйатын сөбүлээбиттэр. Ол курдук, нэдиэлэ иһигэр 5950 кг балык атыыламмыт. Олортон 4500 кг – креветкэ.
Эт эмиэ хамаҕатык барбыт. Уопсайа 11,5 туоннаттан тахса бородууксуйа атыыламмыт. Ону таһынан, 950 кг мүөт, 1500 оҥоһук, 1900 л утах.
Бараан, таба муоһунан, морж, сэлии аһыытынан кыһыыга, мас иһиккэ уруһуйдуурга, сиэлинэн өрүүгэ маастар-кылаастар ыытылыннылар. Уопсайа 126 маастар-кылаас буолбут. Манна 1300 киһи сылдьыбыт. Култуурунай тэрээһиҥҥэ бастыҥ кэлэктииптэр ырыалара-тойуктара үгүс дьон болҕомтотун тарта.
