Бүлүү улууһун биэс нэһилиэгэр: Хампаҕа, Кыһыл-Сыырга, Таһаҕарга, Тыымпыга уонна Чинэкэҕэ түргэн интэриниэт киирдэ. Инньэ гынан, олохтоохтор уонна улуус тэрилтэлэрэ лимиитэ суох түргэн интэриниэккэ, интерактивнай телевидение өҥөтүгэр уо.д.а. холбонор кыахтаннылар.
Бу сыл балаҕан ыйыттан “Ростелеком” исписэлиистэрэ биэс нэһилиэккэ мас тирэхтэри туруоран, волоконнай-оптическай хаабыллары тардыбыттар. Ол курдук, ВОЛСтан нэһилиэктэргэ диэри уопсайа 20,5 км тардыллыбыт. Олохтоохтор ADSL технологиянан сөкүүндэҕэ 5 Мбит түргэннээх тарыыпка холбонуохтара. Ону таһынан, “Wink”, “Умный дом”, “Видеонаблюдение” өҥөлөрүнэн туһаныахтарын сөп.
Аан бастакынан нэһилиэктэр дьаһалталара, уһуйааннар, балыыһалар, оскуолалар, норуот айымньытын дьиэлэрэ холбоннулар. Оптика көмөтүнэн тэрилтэлэргэ интэриниэт түргэнэ сөкүүндэҕэ 50 Мбит буолар.
2019 сылга Бүлүү улууһугар “Ростелеком” 276 км сибээс лииньийэтин тардыбыт. Үүнэр сылга Илбэҥэҕэ диэри телеком тутуллара былааннанар.
ВОЛС тутуута улуус уонна “Ростелеком” бииргэ үлэлээһиннэрин түмүгүнэн олоххо киирэр.
