Войти

Войти

Мииринэй аэропуорда өрөспүүбүлүкэҕэ иккис улахан аэропуорд буолар. Сыллата 280-300 тыһыынча киһи айанныыр.

Аҕыйах хонуктааҕыта Дьокуускайга тохсунньу томороон тымныытын тумана будулуйан, көтөр ааллар адьас кыайан түспэт балаһыанньалара үөскээбитэ. Мантан сылтаан Москубаттан Дьокуускайга диэри “Аэрофлот” уонна “Seven7” авиа-хампаанньалар көтөр ааллара, Мииринэй аэропуордугар түһэн чаардаан олорбуттара. Бу – бастакы түбэлтэ буолбатах.

Улахан тумаҥҥа соҕурууттан Дьокуускайга диэри көтөр ааллары, урут да Мииринэйгэ салайаллар этэ. Даҕатан эттэххэ, Саха сирэ олус киэҥ, суола-ииһэ букатын мөлтөх. Салгын айана ыарахан, ороскуоттаах. Онон, салгын суола хайдах туруктааҕыттан улахан тутулуктаах.

Сэттэ сыл анараа өттүгэр А.Гулов хамандьыырдаах “АЛРОСА-Авиа” авиа-хампаанньа баар буолбута. Бу хампаанньа 600-чэ үлэһиттээх, 300 лүөччүктээх, 13 улахан көтөр ааллаах, 16 бөртөлүөттээх. Алмаас хостуур тэрилтэлэргэ, геология салааларыгар уонна пассажирдары тиэйиигэ үлэлиир.

2019 сылтан туох баар тиэхиньикэ, навигационнай арыаллааhын хааччыллыыта дьэ уларытыллан эрэр. Бу сылтан “АЛРОСА-Авиа” авиа-хампаанньа Москубаҕа, Новосибирскайга, Иркутскайга, Екатеринбурга, Краснодарга, Санкт-Петербурга диэри айан сыанатын улаханнык кыччатта. Арай, Дьокуускайдыыр айан сыаната сиэрэ суох үрдүк – 17.500 солк.

Оннук буолбатын туhугар федеральнай уонна Саха сирин бырабыыталыстыбата, ис эриэйсэлэргэ сыананы чэпчэтэр курдук судаарыстыбаттан мэктиэлэммит субсидияны аныахтаахтар этэ.

Ол кыаллыбакка турар. Бу боппуруоска Сахабыт сирин саламтата, суол-иис салаатыгар эппиэттиир министиэристибэ ылса иликтэр эбит. Федеральнай киинтэн Мииринэй авиациятыгар туhулаан дьэ, дьарыктанан эрэллэр. Сытыы боппуруоспут Саха сирин сyрyн бырамыысалынай бородууксуйатын тосхото олорор Мииринэйгэ, аэробаксаалы уонна пуорт балаһатын тутуу буолар.

Санатан эттэххэ, Мииринэй куорат баксаалын, пуордун туруктара букатын мөлтөх. Эргэ-урба аэробаксаал сотору күрдьүллэр, балаhа уhатыллар диэбиттэрэ ыраатта. Бу боппуруоска, бастатан туран, Өрөспүүбүлүкэ былаастара дьарыктаналлара ирдэнэр.

2020 сыл үүнүүтүгэр Мииринэй аэропуордун тутуутугар балаһыанньаны сырдатыах сонуннары тосхотто. Бастатан туран, куораппыт хоту өттүнэн буор көһөҥөлөрө дьапталҕаламмыт сирдэрин (“Отвалы”) кыйа, саҥа аэробаксаалга диэри аспаал суол тутуллуохтаах. Уһуна биэс биэрэстэ буолуохтаах. Оттон баксаал бэйэтэ быйылгыттан, төрдүс кыбаарталтан тутуллан барыахтаах.

Эһиил көтөр балаһа тутуута саҕаланыахтаах. Ол эбэтэр билиҥҥи балаһа илин диэки эбии уһатыллан биэриллиэхтээх. Оччоҕо көтөр балаһа үс биэрэстэ уһуннаах буолар. Уруккута 2,8 биэрэстэ. Эргэрбит учаастактар өрөмүөннэниэхтээхтэр.

Манна федеральнай уонна “АЛРОСА” хампаанньа үбэ туһаныллыахтаах. Уопсайа, Мииринэй аэропуордун тутууга 20-чэ млрд солк үп көрүллүбүт. Аэропуорт тиһигин тутуута кэмигэр саҕаланнаҕына, 2024 сылга түмүктэнэрэ былааннанар.

 aerobokcaalerge

miirineipyorda

alrocaboing

Станислав Алексеев, Мииринэй куорат.

“АЛРОСА-Авиа” саайтын, Слава Gelio Степанов уонна ааптар хаартыскалара.

 

Тарҕат:

Добавить комментарий