Хамсыгынан сибээстээн биллэриллибит хааччаҕы (дьиэттэн тахсыбакка олорууну) дойду “Роспотребнадзора” үс түһүмэҕинэн, сыыйа кыччатан иһэргэ этиилээх. Бу туһунан тустаах тэрилтэ хотуна Анна Попова сэрэдэҕэ В. Путин ыыппыт мунньаҕар иһитиннэрдэ.
Хас түһүмэх аайы дьон алтыһыан сөптөөх сирдэрин кэрискэтин сыыйа элбэтэр гына быһаарбыттар. Кини онно холобур быһыытынан бастакы түһүмэххэ таһырдьа киэҥ, салгыннаах сиргэ физкультуранан уонна успуордунан дьарыктанарга, оҕолору күүлэйдэтэргэ көҥүллүөххэ сөбүн үллэһиннэ, атыы-тутуу эбийиэктэрин кээмэйдэринэн көрөн, дьоҕустарыттан саҕалаан, онуоха социальнай дистанцияны күүскэ тутуһуннаран үлэлэтиэххэ сөп диир. Иккис түһүмэххэ дьиэ кэргэнинэн уулуссаҕа сэрэнэн күүлэйдииллэрин көҥүллүөххэ сөп үһү. Балаһыанньаттан көрөн, улахан иэннээх атыы эйгэтин эбийиэктэрин үлэлэтиэххэ сөп. Маныаха олус элбэх атыылаһааччы мустубатын курдук дьаһаныы ирдэнэр. Ыарыы аҕырымнаатаҕына, бу түһүмэххэ үөрэх тэрилтэлэрин сыыйа аһаттыахха сөбүн бэлиэтээтэ. Оттон үһүс түһүмэххэ дьэ нэһилиэнньэ сынньанар миэстэтин аһар туһунан толкуйдуохха наада үһү. Ол эбэтэр пааркалары, искибиэрдэри. Маныаха булгуччу социальнай дистанцияны тутуһуу наада. Атыы-тутуу , өҥө оҥорор былаһааккалары иэннэриттэн, кээмэйдэриттэн, килийиэн ахсааныттан тутулуга суох бу үһүс түһүмэххэ көҥүллүөххэ сөп. Ону тэҥэ бу түһүмэххэ үөрэх бары тэрилтэлэрэ, көстүүнэйдэр, уопсастыбаннай ас тэрилтэлэрэ үлэлээбитинэн барыахтарын сөп буолар.
Аны бу түһүмэхтэр истэринэн эрэгийиэн тутаах салайааччылара тустаах сир санитарнай кылаабынай быраастарын этиитинэн, баар усулуобуйаттан, ыарыы тарҕаныыта хайдаҕыттан көрөн, чопчу тэрээһиннэри ыытар бырааптаахтарын эттэ. Ити гынан баран, өскөтүн тустаах кэмҥэ эпидемиологическай балаһыанньа мөлтүүр түгэнигэр хааччахтыыр миэрэ сөргүтүллүөн сөп диэн, лаппыйан бэлиэтээтэ. Хааччаҕы кыччатарга ыарыы тарҕаныытын таһыма, хоруона вируһун эмтиир куойканан хааччыллыы, тиэстэммит дьон төһө элбэҕэ эҥин барыта болҕомтоҕо ылыллыахтаах.
Ол гынан баран, бу хааччахтыыр миэрэ сымнаан биэриитэ олохтоохтортон эмиэ улахан тутулуктааҕын, ол эбэтэр хас биирдиибит төһө харыстанарыттан, хааччаҕы тутуһарыттан тутулуктаааҕын, бу да сырыыга лаппыйан эттэ. Манна сыһыаран эттэххэ, РФ үрдүнэн 68 эрэгийиэҥҥэ мааска эрэсиимэ биллэриллэн турар.
