Чайыҥдаттан Таалакааҥҥа диэри быдан чугас уонна судургу. 73-с км-нэн 130 биэрэстэ усталаах “Чайыҥда –Таалакаан аэропуорда” дьыл ханнык баҕар кэмигэр суоллаах.
Оччотугар баахта үлэһиттэрин тоҕо Таалакаан аэропуордугар тириэрдибэккэ, Мииринэйгэ аҕалар буоллулар? Олус ыксаатахтарына Чайыҥдаттан 170 биэрэстэ ыраах Ленскэйтэн, үһүс категориялаах, буор бүрүөһүннээх аэропуортан Иркутскайга көтөр кыахтаахтар. Ону Мииринэйинэн эрэ көтөллөр. “Газпром” уонна кини бэдэрээттээх тэрилтэлэрин үлэһиттэрин, Мииринэй аэропуордугар “УРАЛ” баахта оптуобустарынан быыстала суох тиэйэллэр.
Таалакаан аэропуордун “Газпром” бас билбэт. Санатан эттэххэ, “Сургутнефтегаз” бэйэтэ туһанаары 6 млрд солк үс биэрэстэ уһуннаах, бэртээхэй баксааллаах аэропуорду туппута. Манан “Боинг” сөмөлүөттэр бары көрүҥнэрэ көтөллөр. Бу – сылга 9 мөл туонна ньиэби хостуур, 500-чэ млрд дохуоттаах “Сургутнефтегаз” хампаанньа бас билиитэ. Туох эрэ биричиинэнэн Таалакааҥҥа барбакка, Чайыҥдаттан 249 биэрэстэ ыраах, куһаҕан суоллаах-иистээх тайҕанан, Мииринэй куоратыгар тиэстэр буоллулар. Мантан “АЛРОСА” уонна “Якутия” хампаанньа сөмөлүөттэрэ, Чайыҥда баахтатын үлэһиттэрин Иркутскайга, Уфаҕа, Новосибирскайга, Москубаҕа, Краснодарга, Томскайга, Омскайга тиийэ көтүтэллэр.
“УРАЛ” вахтовкалар уонча чааһы быһа мөкү, бадарааннаах суолунан мырааннарга тохтуу-тохтуу, алдьана-алдьана, ардыгар соһуллан Мииринэй аэропуордугар кэлэллэр. Мииринэй балыыһатын эмчиттэрэ, “Роспотребнадзор” үлэһиттэрэ, аэробаксаал бэрэстэбиитэллэрэ түүннэри-күнүстэри кинилэри көрсөргө уонна бэрэбиэркэлииргэ бэлэмнэр. Чайыҥдаттан кэлээччилэри “УРАЛ” массыыналарын аэропуорт балаһатыгар киллэрэн регистрациялыыллар. Ол иннигэр тестердэринэн доруобуйаларын туругун бэрэбиэркэлииллэр. Онон, Чайыҥда баахтатын үлэһиттэрэ Мииринэй аэробаксаалыгар киирбэттэр. Бэрээдэк оннук буолла.
Станислав Алексеев. Мииринэй куората.
