“Мииринэй – Кириэстээх – Сунтаар” хайысханан сырыы бобулунна

Өрөспүүбүлүкэ саламтатын дьаһалынан, ыам ыйын 31 күнүгэр диэри улуустар икки ардыларынан массыына сырыыта, дьону таһар таксыылар үлэлэрэ тохтоото.

Маннык кытаанах дьаһал Сунтаар улууһун, Бүлүү өрүһү поруомунан туоратар сэлиэнньэлэригэр суһаллык ылылынна. Онон, Мииринэйтэн Сунтаардыыр таксыылар поруомҥа киирэллэрэ бобулунна. Оччотугар Кириэстээх поруомнара тугу туораталларый? Бастатан туран, эрдэттэн сөбүлэҥнээх, докумуонунан бигэргэтиилээх таһаҕас тиэйэр массыыналары туораталлар. Холобур, Мииринэйтэн бородуукта, табаар таһар Сунтаар улууһун эргиэнин тэрилтэлэрэ: “Сунтарцеолит”, “Сунтаравтодор”, Кэмпэндээйитээҕи туус хампаанньата. “РНГ” хампаанньа поруома өрөспүүбүлүкэ дьаһалыттан тутулуга суох Кириэстээх аннынан сылдьар. Бу поруом соторутааҕыта Сунтаар балыыһатыгар сытан үтүөрбүт “ВССМ” (“РНГ” салаата) уонча үлэһитин туораппыта. Хааччахтааһын ыам ыйын 31 күнүн кэнниттэн уһуллуо диэн мэктиэлээһин суох.

 Станислав Алексеев, Мииринэй куората.