Хамсык сабардыыр кутталын утары охсуһуу салҕанан барар. Мииринэйдээҕи инфекционнай балыыһа хоруона хамсыгыттан сылтаан кэҥээн турар.
Ыарахан туруктаах дьон сытар салаалара (реаниматология) 16, үтүөрэн эрээччилэр – 12, провизорскай кэтэбил салаата 50 миэстэлээхтэр. Иммунология лабораторията түүннэри-күнүстэри үлэлиир. Ыарыыны быһаарар тестиир систиэмэлэр Дьокуускай киэниттэн туох да итэҕэһэ суохтар. Балыыһаҕа анал сэртипикээттээх инфекционист-быраастар, саха кыргыттара Саргылаана Бурнашова уонна Альбина Яковлева сыралыһан үлэлии сылдьаллар.
Ыам ыйын 21 күнүнээҕи туругунан, эмчиттэр “Сovid-19” хабараан ыарыытыгар хаптарбыт, икки өттүлэринэн сэбиргэхтэппит “Газпром” үлэһиттэрин көрөллөр-истэллэр. Уопсайа 9 киһи сытар. Манна ыарыһахтары эмтиир усулуобуйа тэриллибит диэххэ сөп. Холобур, тыҥаны искусственнай быһыылаахтык үлэлэтэр тэриэбэ (ИВЛ), көмпүүтэр томограба, “Изотерм Генериум” фирмэ оҥорбут, ыарыыны түргэнник быһаарар аныгы тестиир систиэмэ, ыарыһах оронугар туруоруллар, кини хаанын баттааһынын, сүрэҕин тэбиитин көрдөрөр Соҕуруу Кэриэйэтээҕи “ВМ-3” уонча монитора баар.
Хоруона хамсыга тарҕаммыт сириттэн – Чайыҥдаттан уонна “РНГ” хампаанньа учаастагыттан кэлбит дьон туругуттан үгүс суол тутулуктаах. Бу дьонтон ыарыы эмчиттэргэ сыстыан сөп диэн, сэрэхэдийэллэрэ оруннаах. Балыыһаҕа ыарахан туруктаах баахта үлэһиттэрэ сыталларыгар, олохтоохтор онно улаханнык санааларын-оноолорун уураллара көстүбэт. Куоракка – дьон толору. Үгүстэрэ харыстанар мааската суох сылдьаллар. “Самоизоляцияҕа” 700-тэн тахса киһи олорор эбит. Ол иһигэр, Мииринэйгэ – 324 киһи. Обсерватордарга 212 киһи сытар. Алмаастаах кыраай кииниттэн 20 биэрэстэ тэйиччи сытар бөһүөлэккэ – Алмазнайга, 50 куойкалаах госпиталь тэрилиннэ. Бу билигин кураанах турар. Балаһыанньа уустугуруон сөбүн учуоттаан маннык госпиталь тэрийдилэр. Мииринэйгэ билиҥҥи туруган балаһыанньа бигэ. Оннук эрэ буоллун.
Станислав Алексеев, Мииринэй куората. Хаартыскаҕа госпитальга кубулуйбут Мииринэй балыыһатын стационара.
