Войти

Войти

Эһигини барыгын ис сүрэхпиттэн Сайылык күнүнэн итиитик-истиҥник эҕэрдэлиибин! Бу бырааһынньык биһиги норуоппут үйэлэри уҥуордаан илдьэ кэлбит үгэстэригэр, тыйыс айылҕаҕа сүөһүнү иитии уустук дьарыгар биһиги дириҥ  ытыктабылбытын  кэрэһилиир.

Саха дьонугар-сэргэтигэр сайылыкка көһүү самаан сайын кэлиитин, күөх от дыргыл сытын, түптэ унаар буруотун, бастакы куйаас күннэри кытта ситимнээх. Биһиги өбүгэлэрбит күөххэ үктэммиттэриттэн сүргэлэрэ көтөҕүллэн сүөһүлэрин мэччирэҥҥэ үүрэллэрэ, сайылыктарын оҥостоллоро.

Билигин эмиэ сүүһүнэн сыллар анараа өттүлэригэр курдук, өрөспүүбүлүкэ тэриллиилээх уонна бааһынай хаһаайыстыбалара сүөһүлэрин илдьэ сайылыкка көһөллөр. Төрөппүттэрин кытта сайылыкка оҕо-аймах эмиэ тахсыhар. Кинилэр сүөһүнү көрөргө дьонноругар илии-атах, көмө буолан сайыҥҥы сынньалаҥнарын туһалаахтык атаараллар, үлэҕэ-хамнаска кыра эрдэхтэриттэн сысталлар, утуму салгыыллар.

Бүгүҥҥү үөрүүлээх күҥҥэ өрөспүүбүлүкэ тыа хаһаайыстыбатын үлэһиттэригэр барыларыгар истиҥ махтал тылларын этиэхпин баҕарабын. Тыа сирин олохтоохторо уустук кэми аахсыбакка, аан дойдуну аймаабыт кутталлаах ыарыыны кытта охсуһуу үгэннээн турдаҕына салгыы үлэлии-хамсыы сылдьаллар, урукку көрдөрүүлэри куоһарарга дьулуһаллар.

Тыа хаhаайыстыбатын салаата үүммүт дьылы үтүө түмүктээх көрсүбүтэ. 2019 сыл түмүгүнэн өрөспүүбүлүкэҕэ кэнники уонунан сыллар  усталарыгар сүөһү бары көрүҥэр өтөрүнэн бэлиэтэммэтэх көрдөрүү аан бастакытын ситиhилиннэ. Ол курдук өрөспүүбүлүкэ хаьаайыстыбаларыгар ынах сүөһү, сылгы, таба, сибиинньэ уонна көтөр ахсаана элбээтэ. Бу – инникигэ дьоһун хардыы. Сахабыт Сиригэр төһөнөн элбэх хаачыстыбалаах бэйэ бородууксуйатын оҥоробут да, соччонон ханнык баҕарар кутталтан көмүскэллээх буолабыт!

Сайылык күнэ православнай халандаарынан ыам ыйын 22 күнүгэр бэлиэтэнэр Ньукуолун күнүгэр түбэһэрэ бэлиэ суолталаах. Бу күн биһиги, Саха сирин олохтоохторо, алаадьылаан, кус миинэ буһаран чугас дьоммутун күндүлүүр, сир-дойду иччитин аһатан-алҕаан, айыыларга үҥэн-сүктэн үүнүүлээх, өҥ-быйаҥ сайыны көрдөһөр үтүө үгэстээхпит.

Күндү биир дойдулаахтарым! Маннык үтүө күҥҥэ эһиэхэ чэгиэн туругу, эйэни, этэҥҥэ буолууну баҕарабын! Күүтүүлээх самаан сайыммыт үөрүүнү аҕаллын, дьоллоох эрэ түгэннэри тосхойдун!

 Саха Өрөспүүбүлүкэтин   Ил Дархана   Айсен Сергеевич Николаев

 

Тарҕат:

Добавить комментарий

Бүтэһик сонуннар