Саха сиригэр хоруона хамсыгар 81 саҥа киһи хаптарбыта бигэргэннэ, 12 киһи үтүөрдэ, биир киһи өллө.
Дьокуускайга – 56, Алдаҥҥа – 12, Мииринэйгэ – 4, Намҥа, Мэҥэ Хаҥаласка үстүү, Ленскэйгэ – 2, Тааттаҕа – 1 киһи ыалдьыбыта бигэргэннэ. Сүрүннээн дьиэ кэргэҥҥэ, алтыһар дьонноруттан сыстыспыттар. 12 киһи бэҕэһээ үтүөрэн тахсыбыт: 6 – Дьокуускайга, 3 – Алдаҥҥа, 2 – Горнайга, 1 – Хаҥаласка. Уопсайа хамсык кэмигэр 546 киһи үтүөрбүт.
Дьокуускайга “Covid-19” диагнозтаах 76 саастаах дьахтар өлбүт. Кини саахардаах диабеттаах, инсулин туттар эбит. Уопсайа бу кэмҥэ өрөспүүбүлүкэҕэ 1357 ыарыһах бигэргэммит, 546 киһи үтүөрбүт, 7 киһи өлбүт. Дьокуускайга 10 ыарыһах ыарахан туруктаах сытар, 313 киһи чэпчэкитик аһарынар, кинилэр тастан эмтэнэллэр. Саха сирин лабораториялара суукка устата 2578 теһи оҥорбуттар, 670 киһи обсерваторга сытар.
