Ил Дархан Айсен Николаев хоруона хамсыгынан сибээстээн, быйыл оскуоланы бүтэрээччилэргэ 5 тыһ. солк. көмө харчыны биэрэрин туһунан эппитэ.
Маныаха бу көмөнү хайдах ылар туһунан бэрээдэги бигэргэттилэр. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Ол курдук,выпускник 18 сааһын туола илик буоллаҕына, бу 5 тыһ. солк. биир эмэ төрөппүтэ эбэтэр сокуоннай бэрэстэбиитэлэ ылыан сөп, оттон 18 сааһын туолбут оҕо бэйэтин аатыгар ылар. “Бу көмө харчыны ыларга выпускник үөрэммит оскуолатын дириэктэрин аатыгар анал формаҕа сайабылыанньаны суруйуон наада”,– диэн иһитиннэриигэ суруллар. Маныаха коронавируһунан сибээстээн, выпускник сайабылыанньаны ыраахтан , кимниин да алтыспакка эрэ биэриэхтээх. Улуус уонна куорат баһылыктара бу көмөнү кимнээх ылалларын анал реестргэ киллэрэн туһааннаах биэдэмэстибэлэргэ сөбүлэҥҥэ ыыталлар. Ол кэннэ социальнай төлөбүр кэннигэр сайаапка кэллэ да, үс үлэ күнүн иһигэр көмө харчы тустаахтарга түһэр.
