РНА академиятын вирусолога Виталий Зверев: “Саас-күһүн сыстыганнаах ыарыы мэлдьи да элбиирин курдук, Арассыыйаҕа хоруона хамсыга өссө тэнийдэ эрээри, онтон сылтаан харантыыны биллэрэр сыыһа буолуо.
Ону тэҥэ, хамсык “иккис долгуна кэллэ” дииллэрэ эмиэ сыыһа, тоҕо диэтэххэ “бастакы долгун” өссө да бүтэ илик. Хамсык билигин бүтэ илик, устунан, бу вирус сезон аайы кэлэр ыарыыга кубулуйара буолуо. Ити билигин хамсык элбээн кэлбитэ улахан куттала суох дии саныыбын. Дойду салалтата да, Роспотребнадзор да “балаһыанньаны хонтуруоллаан олоробут” дииллэр, мин эмиэ онно сөбүлэһэбин. Харантыын биллэриллибэтэ буолуо”, -- диир.
Оттон Роспотребнадзор эспиэрэ Михаил Лебедев “дьаҥҥа хаптарбыт дьон ахсаана сэтинньигэ муҥутуурдук улаатыа эрээри, бу сааскыга (кулун тутарга-ыам ыйыгар) аны хаһан да тиийиэ суоҕа. Саамай сүрүнэн, ыарыы киһиттэн киһиэхэ быһа бэриллэн тарҕаныытын бохсуохпутун наада. Тэнийэн истэҕин аайы, хоруона вируһун сууһарар күүһэ кыччаан иһэр. Онно эбии, маассабай быһыы ылыыта балаһыанньаны тупсарыа. Инньэ гынан, 2021 сыл бүтүүтүгэр бу ыарыы куттала букатын да уостан барыа. Хоруона вируһугар сыһыаннаах өйдөммөт, мунаах балаһыанньа суоҕун быһыытынан, хааччах-харантыын биллэриллиэ суоҕа” диир.
