Аҕыйах хонуктааҕыта “Кыым” эрэдээксийэтин кэккэ үлэһиттэригэр Азербайджантан, Казахстантан, Астрахантан урут үлэбитинэн алтыһан ааспыт билэр дьоммут, суруналыыс кэллиэгэлэрбит, түүр омук бэрэстэбиитэллэрэ төлөпүөннүү, бассааптыы сырыттылар.
Кинилэр “ити интэриниэтинэн ханнык эрэ саха дьахтара саҥарарын иһиттибит, ити билигин буола турар Хайалаах Карабах сэриитигэр түүр тыллаах сахалар армяннар диэки ыалдьар эбиккит дии... Чахчы оннук дуо?” диэн ыйыталлар. Наһаа соһуйбуттар... Ол дьахтар уһуллубут запиһын армяннар сэрии буола турар Азербайджаныгар, атын түүр өрөспүүбүлүкэлэригэр барытыгар “ыһан” кэбиспиттэр үһү... “Түүр тыллаах сахалар армяннар диэкилэр” диэн...
Биллэрин курдук, билигин Хайалаах Карабахха Азербайджан уонна Армения икки ардыгар хаан тохтуулаах сэрии бара турар. Азербайджан өттүттэн, ХНТ-нан бигэргэммит сокуоннай бас билэр сирдэрин Армения күүһүнэн былдьаан ылбытыттан босхолуур сэрии бара турар. Барыта – ОБСЕ быһаарыытын чэрчитинэн. Кинилэр Карабахха бэйэтигэр олохтоох армяннары өлөрөбүт-өһөрөбүт диэбэттэр. Онон, хайа да өттүнэн эргиппит иһин, кырдьык – кинилэр өттүлэригэр.
Ол үрдүнэн “Маргарита Мартыновабын, Саха өрөспүүбүлүкэтин Оператын уонна балетын тыйаатырын үлэһитэбин” дэммит дьахтар “биһиги тапталлаах Армениябытыгар, Улуу Арменияҕа кыайыыны баҕарабыт...” эҥин диэн бэрт өрө күүрүүлээхтик, субу сэриилэһэ барыах киһи курдук уоттаахтык-төлөннөөхтүк этитэлиир... “Армения кыайбытын кэннэ онно баран сольнай кэнсиэри ыытыах” буолан суоһурҕанар (ол кини кэнсиэригэр анараа ким эрэ наадыйара эбитэ дуу...)
Билигин аан дойду барытын үрдүнэн 200 мөл. кэриҥэ түүр тыллаах омук баар. Арассыыйаҕа бэйэтигэр – 20 мөл. чугаһыыр. Бу дьон 100 % буолбатаҕына, баһыйар үгүстэрэ, билигин Хайалаах Карабахха буола турар сэриигэ бэйэтин кырдьыгын иһин охсуһар, эмиэ түүр тыллаах Азербайджан туһугар долгуйаллара өйдөнөр. Билигин саха ыччата аан дойду, Арассыыйа бары муннуктарыгар тиийэн үлэлиир, үөрэнэр. Оттон ити курдук “Мартыновалартан” сылтаан биһиги ыччаппытыгар “сахалар, түүр омук таҥнарыахсыттараҕыт” эҥин диэн атын түүр тыллаах омуктартан араас үтүрүллүү, туоратыы көбөн кэлиэн сөп. Көбөн да эрдэҕэ.
Бу Маргарита Мартынова диэн кимий, Опера уонна балет тыйаатырыгар чахчы итинник ырыаһыт баар дуо? Өскөтүн баар да эбит буоллаҕына... Кини тус бэйэтэ армяннары кытта туох эрэ ыкса сыһыаннаах да эбит буоллаҕына, тоҕо онно Саха өрөспүүбүлүкэтин, саха омугун, Саха Судаарыстыбаннай оператын уонна балетын тыйаатырдарын ааттарын сөрүөхтээҕий? Эбэтэр, киниэхэ оннук дьаһалы Тыйаатыр салалтата биэрдэ дуу?
СӨ Култууратын министиэристибэтэ култуура үлэһиттэрин өттүттэн бу маннык соруйан оҥоһуллар провокацияларга туох санаалааҕый?
Оттон Армения-Азербайджан биһигинэ да суох быһаарсыахтара.
“Кыым” эрэдээксийэтэ.
Сэҥээриилэр
Ким билээ эрэр. Билигин ону- маны барытын суруйаллар. Онтон итини провокация курдук керуеххэ сеп эбитэ дуу? Эмиэ да ньиэрбэтинэн ыалдьар со5ус дьахтар диэччилэр бааллар этэ.