Саха сирэ уонна Арассыыйа Дьиэ-уот хомунаалынай хаһаайыстыбатын реформатын ыытыыга көмөлөһөр Пуондата гражданнары хаарбах дьиэттэн көһөрөргө үбү көрөргө эбии сөбүлэҥи түһэрсиэхтэрэ. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрдэ.
Пуонда кэтээн көрөр сиэбиэтин бэрэссэдээтэлэ Сергей Степашин уонна госкорпорация баһылыга Константин Цицин бүгүн Дьокуускайга көтөн кэлбиттэр. Хаарбах дьиэттэн көһөрүү бырагырааматыгар сыһыаннаах Айсен Николаев, бырабыыталыстыба чилиэттэрэ уонна улуус баһылыктара кыттыылаах киэҥ ыҥырыылаах мунньах кэннэ үөһэ ыйыллыбыт сөбүлэҥҥэ Ил Дарханы кытары илии баттыахтара. Маны таһынан дэлэгээссийэ Жатай бөһүөлэгэр Северная уул. 33/2 №-дээх дьиэтигэр сылдьыахтара. Бу 68 кыбартыыралаах дьиэҕэ хаарбах дьиэттэн көспүт гражданнар олороллор. Жатай бөһүөлэгэ Арассыыйаҕа аан бастакы хаарбах дьиэттэн бүтүннүү көһөртөөбүт бастакы нэһилиэнньэлээх пуунунан ааттанар. Маны таһынан, Айсен Сергеевич уонна госкорпорация салайааччылара Жатайга уу ситимин модернизациялааһын бырайыагын кытары билсиэхтэрэ.
