Войти

Войти

Уодаһыннаах, ыар тыыннаах хоруона хамсыга Саха сирин арҕаа түөлбэтигэр сүтэн-оһон быстыбат.

Хас киһи сырдык тыынын быста, бу дьаҥ?! Дьалхааннаах олохпутугар, эмп-томп эйгэтин тылларын дьон үксэ билэр: "КТ", "ПЦР", “Провизорнай салаа”, “Кыһыл ковиднай зона".

Барыбыт да уйулҕата сылайан олорор. Киһини сэргэхситэр сонунунан – күүтүүлээх хоруона хамсыгын утары күүстээх вакцна кэлиитэ буолуохтаах этэ. Ол эрэн, Мииринэйгэ – күн-бүгүн уу-чуумпу. Күүтэбит.Вакцинаны, бастатан туран, эмчиттэр, үөрэҕирии салаата, социальнай үлэһиттэр ылыахтаахтар. Саатар дьаҥы утары охсуһар арбидол, курантил эмтэр, биһиэхэ, аптекаларга мэлигирдэр. “Арбидол” оннугар “ингаверин” диэн олус ыарахан сыаналаах эми атыылаһабыт.Мурун сарыытыгар ыстарар  “гриппорферон” спрей суох буолан солбудаһыгы көрдүүбүт. Бастатан туран, тумууну бохсор күүстээх эмп ирдэнэр.

Уопсайынан, суукка ахсын, хоруона хамсыгар хаптарбыт ахсаана Мииринэйгэ үксээн иһэрэ долгутар. Аам-даам тымныы бүрүүкээтэҕинэ хоруона хамсыга хаптайыа диэбиттэрэ сымыйа эбит. Күн-бүгүн Мииринэй инфекционнай балыыһатын “кыһыл” ковиднай уонна провизорскай отделениелара – толорулар. Ыарыһахтар үгүстэрэ эдэр дьон буолаллара дьиксиннэрэр.Мииринэй оройуона хаарчахтааһын эбэтэр «самоизоляция» эрэсиимин сымнаппыта мөкү өттүнэн диэлийэн таҕыста. Ол курдук, былаастарынан остолобуойдары, кафелары, закусочнайдары, чайхананы арыйыыга көҥүллэммитэ букатын бөрүкүтэ суох түмүктэрдэнэн эрэр. Суукка ахсын 12-14 ыарыһах тахса туруута – бу киһини дьиксиннэрэр дьыала. Бу – Мииринэй оройуонугар олохтоох, пропискалаах дьон. Оттон ньиэп-гаас, уо.д.а баахта хоруона хамсыгынан ыалдьыбыт дьоно, Саха сирин ыстатыыстыкатыгар хара маҥнайгыттан киирбэтэхтэрэ. Тоҕо диэтэххэ, ол дьон – атын эрэгэйиэн дьоно, пропискалаах сирдэрэ туспа.

Хоруона хамсыгын көҥүл күүлэйдээһинигэр төрүөт элбэх.

Мииринэйгэ ыччаты ончу кыайан хонтуруоллаабатылар. Олоруҥ таптаабыттарынан сылдьаллар. Харыстанар маасканы кэтиини, “социальнай дистанцияны” букатын дьаалайбаттар. Подъезтар ахсын бөлөҕүнэн мусталлар. Мииринэй – соҕуруу дойдуттан Саха сирин диэки саамай элбэх, тигинэччи кэлии-барыы дойдута. Бэлиэтээн эттэххэ, бастакы хоруона хамсыктаах ыарыһах Москубаттан (Мииринэй олохтооҕо) муус устар ыйын 15 күнүгэр бэлиэтэммитэ. Онуоха диэри Мииринэй хоруона хамсыгын ыарахан тыынын билбэккэ олорбута.Оттон “РНГ” хампаанньатын баахтатын үлэһиттэрэ маассабайдык ыалдьааттарын кытары, Мииринэй балыыһатын стационара суһаллык, 50 куойкалаах инфекционнай госпитальга уларытыллыбыта. “Кыһыл” ковиднай зона, алта (кэлин 10 буолбута) миэстэлээх реанимация, провизорскай салаа баар буолбуттара. Билигин балыыһа куойкатын ахсаана 160 буолла.Ахсынньы ыйга хоруона хамсыгын тула балаһыанньа Мииринэйгэ бэрдэ суох. Мииринэй балыыһатын эмчиттэрин бэйэлэрин харыстаммат быһыыларынан эрэ сүрүннэнэр. Төһөлөөх эмчит хоруона хамсыгынан ыарыйда.

Киһини салыннарар балаһыанньа!

Станислав Алексеев. Мииринэй куората.

Матырыйаалбар МЦРБ пресс-сулууспатын информацияларын туһанным.    

Тарҕат:

Добавить комментарий