Ил Дархан бүгүн Дьокуускайдааҕы бырамыысыланнас техникумугар Тарас Десяткин аатын үйэтитэр туһунан уураахха илии баттаата.
Социалистическай Үлэ Героя, Ленин уордьанын кавалера, икки Үлэ Кыһыл Знамятын, Октябрьскай өрөбөлүүссүйэ уордьаннар кавалердара, ЯАССР үтүөлээх горняга, СӨ, Алдан, Мэҥэ Хаҥалас, Томпо улуустарын, Дьокуускай куорат Ытык олохтооҕо Тарас Гаврилович Десяткин албан аатын үйэтитэр сыаллаах Дьокуускайдааҕы бырамыысыланнас техникумугар сырдык аата иҥэрилиннэ.
Санатар буоллахха, 1984 сыллаахха алтынньы 25 күнүгэр хайа бырамыысыланнаһыгар каадырдары бэлэмниир сыаллаах, “Якутзолото” базатыгар Дьокуускайдааҕы 16-с №-дээх ПТУ арыллыбыта. Ити кэмҥэ “Якутзолото” холбоһугу Тарас Десяткин салайан олорбута.
Билигин техникуму 2015 сылтан ыла Станислав Христофоров салайар. Аҕыйах сыл иһигэр манна материальнай-тэхиниичэскэй базаны тупсарыыга улахан үлэ барбыт, “Дизайн лабораторията” диэн коворкинг-киин аһыллыбыт уонна ювелирнай оҥоһуктарга үөрэтэр кластер арыллыбыт. Техникум ювелирнай уонна алмааһы хостооһуҥҥа үрдүк кылаастаах каадырдары бэлэмниир.
Сэҥээриилэр