Чурапчы нэһилиэгин тэрилтэлэрэ Маай бырааһынньыгын күргүөмнээх үлэнэн көрүстүлэр. Бары түмсэн параадтаан сэлэлии хааман баран, субуотунньукка таҕыстылар.
Бастаан, үгэс курдук, тэрилтэлэр ох курдук оҥостон, сэлэлии хаамтылар.
Быйыл Чурапчы сэлиэнньэтэ сурукка киирбитэ 370 сыла, ол чэрчитинэн 370 үтүө дьыала аахсыйа ыытыллар.
Дьон сэргэ сааскы сандаархай күҥҥэ өрө көтөҕүллэн туран субуотунньуктарга кытыннылар.
Эрдэттэн сыһыарыллыбыт сирдэри, уулуссалары хомуйдулар.
Улахан тэрилтэлэр тиэхиньикэ таһааран, хаарбах тутуулары көтүрэн ыраастаатылар, киин уулуссалар дэхсилэннилэр.
Биирдиилээн дьон дьиэлэрин таһын ыраастаан дьоһун кылааттарын эмиэ бу үлэ бырааһынньыгар уктулар.
Эбиэттэн киэһэ киин болуоссакка норуот күүлэйэ тэриллиннэ, тэрилтэлэр икки ардыларыгар сүүрүүгэ эстафета ыытылынна.
Надежда Кузьмина
