РФ Бырабыыталыстыбата сыл ахсын биэнсийэҕэ тахсыан иннинээҕи саастаах дьон идэлэрин таһымын үрдэтиигэ анаан 5 млрд солк. биэрэргэ былаанныыр. Бу туһунан Госдума бүддьүөккэ уонна нолуокка кэмитиэтин мунньаҕар үлэ уонна социальнай бэлиитикэ миниистирэ Максим Топилин иһитиннэрдэ.
“Биһиги биэнсийэҕэ сааһыгар үктэнээри сылдьар дьоҥҥо анал бырагырааманы суруйдубут. Онуоха бырабыыталыстыба сөптөөх үбү көрүөҕэ. Билигин ит суума сыллата 5 млрд солк. тэҥ буолуо диэн суоттанабыт”, — диэтэ тойон Топилин.
Мунньахха этиллибитинэн, биэнсийэни ааҕыы формулата уларыйбакка оннунан хаалыаҕа. Билигин хайдах ааҕыллар да, кэнэҕэһин да оннук буолуоҕа. Топилин этэринэн, маны таһынан болдьох иннинээҕи Хотугу биэнсийэ оннунан хаалыаҕа.
Биллэрин курдук, биэнсийэ реформатын чэрчитинэн, оргууй аҕайдык биэнсийэҕэ тахсар саас үрдээн иһиэҕэ. Максим Топилин “маннык уларыйыылары чуолаан билигин киллэриэххэ наада, тоҕо диэтэххэ, билигин үлэ ырыынагар киирээччи аҕыйах” диир. Кини этэринэн, маннык уларыйыы билигин буолбатаҕына, аны 20 сылынан биирдэ сатаныа үһү.
Маны таһынан, тойон Топилин этэринэн, Арассыыйаҕа олох уһуна улаатыа үһү. Инньэ гынан 2000 сылтан 2030 сылга диэри эр дьон сааһа 17 сылынан уһуо үһү. “2000 сылтан номнуо 8 сыл уһаата”, — диир Топилин.
Кэмитиэт мунньаҕар биэнсийэ саҥа сокуонун өйөөтүлэр уонна бастакы ааҕыыга ылыналларыгар мэктиэлээтилэр.
“Бу сокуон ылылыннаҕына, 2019 сылга биэнсийэ номнуо ортотунан 1 тыһ. солк. үрдүөҕэ, эбэтэр 7 %, ол аата сылыктанар инфляцияттан икки төгүл улаатыаҕа”, — диэн Кэмитиэт түмүгэр суруллар.
Госдума от ыйын 19 күнүгэр сокуон барылын пленарнай мунньаҕар бастакы ааҕыыгар көрүөҕэ.
