Хоруона хамсыга тарҕамматын туһугар, ыам ыйын 31 күнүгэр диэри Өлүөнэ, Алдан уонна Бүлүү өрүстэринэн туоратыыга уонна уу тыраанспардарын өҥөтүгэр хааччахтааһыннар киирдилэр. Бу туһунан бырабыыталыстыба пресс-сулууспата иһитиннэрэр.
Ол курдук, Өлүөнэ өрүскэ Дьокуускай – Аллараа Бэстээх, Хангалаас – Суотту, Хачыкаат – Мохсоҕоллоох, Өлүөхүмэ – Ленскэй, Ленскэй – Пеледуй – Витим, Дьокуускай – Өлүөхүмэ, оттон Алдан өрүскэ Мэҥэ-Алдан – Кэскил уонна Бүлүү өрүскэ Үөһээ Бүлүү – Хоро, Устье – Сунтаар, Ньурба – Күндээдэ, ону таһынан, Сунтаар улууһун Кириэстээх нэһилиэгин хайысхатынан хааччахтааһыннар баар буоллулар.
Искэн эбэтэр гемодиализнай ыарыылаах дьон (медицинскэй направлениялаах буоллахтарына) эмтэнэ бараллара көҥүллэнэр. Ону таһынан, Аллараа Бэстээх тимир суолун пассажирдара (билиэттэрэ баар буоллаҕына) уонна билиҥҥи кэмҥэ тохтообокко үлэлии турар тэрилтэлэр үлэһиттэрэ (үлэлэриттэн ыспыраапкалаах буоллахтарына) өрүһү туоруохтарын сөп.
