Дьокуускай куораттааҕы суут ХИФУ устудьуоннарын профсойууһун тэрилтэтин 200 тыһ. сууммаҕа ыстарааптаата. Бу күһүн буолбут бастакы куурус устудьуоннарын кэнсиэрин, саньытаарынай ирдэбиллэри кэһэн туран ыыппытын иһин.
Санатар эбит буоллахха, бу күһүн, балаҕан ыйын 12 күнүгэр, Ил Дархан маассабай тэрээһиннэри боборун туһунан уураах тахсыбытын үрдүнэн, кэнсиэр тэрийээччилэр куорат таһынааҕы Табаҕа бөһүөлэгин таһыгар 1500 дьон ахсааннаах кэнсиэр оҥорбуттар, элбэх эстрада ырыаһыттарын ыҥырбыттар.
Кэнсиэр кэнниттэн социальнай ситимнэргэ уопсастыбыннас, бачча ыарыы саҕана, маннык тэрээһини ыытар сиэрэ суоҕун, баламатын биллэрэн, студеннар профсойуустарын сэмэлээбитэ.
Судьайа бастаныбылыанньа таһаарарыгар, кэнсиэр кэмигэр ыарыыттан харыстыыр ирдэбиллэр тутуһуллубатахтарын ыйда. Итиэннэ туох да мааска да, бэрчээккэ да кыттааччыларга бэриллибэтэҕэ чопчуламмыт. Арыттаах, анал олорор миэстэлэр хааччыллыбатахтарынан сибээстээн, дьон тоҕуоруһа мустубут. Ыарыы сыстар куттала үөскээбит.
Суут устудьуоннар профкомнарыгар – 200 тыһ.солк. административнай ыстараап анаата.
