РФ Оборуонаҕа министиэристибэтэ иһитиннэрэр:
- Луганскайтан кимэр бөлөх Арассыыйа байыаннай күүстэрин (АБК) көмөтүнэн өстөөх оборуонатын тоҕо көтөн, 4 км ДНР чаастара 6 км иһирдьэ киирбиттэр;
- Барыта 1067 байыаннай инфрастуктура эбийиэктэрэ, ол иһигэр 28 салайар пууннар, 38 ракетаны утары С-300, Оса, БУК М-1 ракетнай-зенитнай комплекстар, 56 радиорелейнай ыстаансыйа, 3 “Байрактар”, 254 тааҥка уонна БТР-дар, аэропортарга турбут 31 байыаннай сөмөлүөттэр, 46 реактивнай систиэмэ (РСЗО), 1034 бууска, миномет, 167 байыаннай маассыына уо.д.а. тиэхиньикэ үлтүрүтүллүбүт. Генерал-майор Конашенков биһиги сүтүктээхпит да, нацистар уонна Украина сэбилэниилээх күүстэрин (УКС) киэннэрэ биһиэнинээҕэр быдан элбэх диэтэ.
Кини биһиги билиэн ылбыт Украина байыаннайдарыгар киһилии сыһыаннаһабыт, оттон нацистар биһиэннэрин билиэн ылбыттарын сордорун сордуулларын, өссө видео устан ыыталлар, ол эрээри, кинилэр сирэйдэрин, кимнээхтэрин, куоластарын соцситимнэртэн устан кимнээхтэрин билэбит, барыларын тутан эппиэттэтиэхпит диэтэ.
***
ДНР байыастара кэпсээбиттэринэн, Донетчинаҕа баар УСК чаастарын 5 сиргэ төгүрүктээбиттэр (хочуолга). Мариуполь төгүрүтүллэн олорор, “Азов” бөҕөргөтүммүт “Азовсталь” собуоттарын анныгар бомбоубежище баар диэн, эйэлээх нэһилиэнньэни албыннаан киллэрэн хаххаламмыттар. Күүстээх сэрии сэбинэн ыттарбакка олороллор.
Арассыыйа байыаннайдара киирэллэригэр УСК сулууспалаахтарыгар, нэһилиэнньэҕэ үчүгэйдик сыһыаннаһыҥ диэн бирикээстээх этилэр. Онон улахан куораттары тумна бараллара. Ити сымнаан биэрэн, тыытыллыбакка хаалбыт бөлөхтөр кэннилэриттэн сылдьан, хаалан иһээччилэри үлтүрүтэлииллэрин көрөн, билигин кэннибититтэн саба түспэтиннэр диэн, ыраастана-ыраастана барар буолбуттар. Харьков куораты анал чаастар босхолоон, бэҕэһээ аҥаардаппыт этилэр. Куораттарга УСК чаастара байыаннай тиэхиньикэлэрин арассыыйалар тыыппаттар диэн билэн, элбэх дьон олорор дьиэлэрин быыстарыгар туруоран, дьонунан хаххаланаллар.
АБК тиэхиньикэтин тохтотоору муоста бөҕөлөрүн бэйэлэрэ дэлби тэптэрдилэр. Саамай киэн туттууларын – аан дойду үрдүнэн саамай улахан сөмөлүөттэрин “Мрияны” бандеровецтар тоҕо тэптэрбиттэр.
***
Бу сарсыарда Москуба бириэмэтинэн 05.00 чааска Белоруссия десантниктара сэриигэ кыттыыны ыла киирэллэр диэтилэр.
Евросойуус Украинаҕа ыарахан сэрии сэптээх байыаннай көмөнү улахан сөмөлүөтүнэн ыыппытын, Арҕаа эрэ Украинанан барыан сөп диэн, Польшаҕа, кыраныыссаттан 100 км ыраах аэропортка түһэрэн баран массыынанан ыытаары сылдьаллар. Ону биһиэннэрэ Украина сиригэр киирдэ да, дэлби тэптэриэхпит диэн сэрэппиттэр этэ.
***
Бэҕэһээ Харьковщина, Николаевщина, Сумщина уо.д.а. уобаластарын сэбиэттэрин дьокутааттара Украина федеративнай өрөспүүбүүлүкэтэ диэн саҥа судаарыстыбаны тэрийии манифеһын дьүүлгэ таһаарбыттар.
Анал эпэрээссийэ үһүс хонугуттан араас провокация, дезинформация, Арассыыйаны утары пропаганда бөҕө күөдьүйбүт. Эбии аан дойдуну тардыбыттар.
Биһиги информация сэриитэ итинник ииригириэ диэн улаханнык бэлэмнэммэтэхпит чахчы. Араас баддьыалка, сымыйа видео устан ыытыы элбэх. Холобур, биир “билиэн ылбыт киһилэрин” кырбаан баран “Слава Украине” диэн хаһыытата сатыыллара сымыйа, устуу видео эбитин биир суукка буолан баран билбиттэр.
***
Гомельга буолуохтаах тупсуу кэпсэтиитигэр Байден ыган, Лукашенко албакааттан, Зеленскэй бэҕэһээ дьонун ыыппыта Польшанан эргийэн бүгүн тиийбиттэр. Аны билигин кыраныыссаҕа туран кэпсэтэллэр үһү. Туох дииллэр.
***
Арҕаа дойдулар Арассыыйаҕа сөмөлүөт көппөтүттэн SWIFT араарыытыгар тиийэ санкция бөҕөнү түһэрэ сатаан эрэллэр. Путин Евросойуус тойотторо агрессивнай саба түһүүлэрэ элбээбитин иһин, оборуона миниистирэ С. Шойгуга ракетнай ядернай сэрии сэбин ытарга бэлэм тутарга бирикээстээтэ. Ол кэннэ анарааҥҥылар сибилигин тырыта тыытыах буолбуттара, “муустаах уунан” саба ыстаран, уоскуйа быһыытыйдылар. Байден кытта Путин ядернай сэрии сэбинэн ытартан туттунар буолуохтаах диэтэ.
***
Уопсайынан, Европаны кытта улахан, халыҥ тимир быыс түстэ. Биһиги ыраах олорор дьон итиннэ улаханнык кыһаллыбаппыт буолуо. Билигин үөскээбит усулуобуйаҕа сатаан олоро үөрэниэхпитин наада.
Туох буолуо дииллэрий? Быйыл экэниэмикэ үүнүүтэ төһө да ньиэп сыаната үрдээтэр, 0,5–1,5% түһүө, дуоллар 80-85 солк. буолуон сөп, инфляция 7% үрдүөн сөп диэн этэллэр. Олох быстан-ойдон барыахпыт суоҕа да, Саха сиригэр экэниэмикэ оҥорон таһаарар салаатын сайыннарыыга болҕомто уурарбыт, дьону үлэнэн хааччыйыыны кыайыахпытын наада.
Бу анал эпэрээссийэ аармыйа таһымнаах дэнэр, ол 14 хонук барар. Онтон уһаабакка бүтэр ини диэн эрэнэбит.
Владимир Степанов.
