Киирии

Киирии

Ыам ыйын 7-12 күннэригэр Кытай Чэнду куоратыгар инбэлиит спортсменнар олорон эрэ оонньуур волейболларыгар “World Super 6” диэн дьахталлар аан дойдутааҕы турнирдара буолан ааста.

Былырыыҥҥы турнир быһаарыылаах оонньуутугар Арассыыйа сүүмэрдэммит хамаандата 3-1 ахсаанынан – икки сыллааҕыта Рио-де-Жанейроҕа ыытыллыбыт XV Паралимпиада чөмпүйүөнэ Эмиэрикэ хамаандатын кыайан – бастакы миэстэҕэ тахсыбыта.

Бу сырыыга Чэнду куоракка Арассыыйа, Казахстан, Кытай, Индонезия, Япония уонна Украина сүүмэрдэммит хамаандалара күрэхтэстилэр. Арассыыйа хамаандатын састааба: Ирина Смирнова, Юлия Медникова, Ирина Панина, Любовь Пермякова, Екатерина Окорокова, Елизавета Кунстман, Ольга Арбатская, Татьяна Иванова, Анна Годовицына, Светлана Чуракова (бары Москуба уобалаһын уонна дойду киин куоратын оонньооччулара) уонна Алена Дмитриева (Саха сирэ). Хамаанда сүрүн тириэньэрэ – Александр Овсянников.

Арассыыйа хамаандата күрэхтэһиини хотторууттан саҕалаабыта, 0-3 ахсаанынан Кытай дьахталларыгар кыайтарбыта. Бу кэнниттэн кыргыттарбыт хаардыы хаампыттара – Казахстан, Япония, Украина уонна Индонезия хамаандаларын 3-0 ахсаанынан кыайталаабыттара.

Дьэ, онтон, ыам ыйын 12 күнүгэр быһаарыылаах оонньуу: Кытай – Арассыыйа. Бу сырыыга кыргыттарбыт күппүлүү барбатылар, олохтоох хамаанданы кытта эрбии биитинии эристилэр. Бастакы баартыйаҕа Арассыыйа хамаандата бэрт кыранан баһыйтарбыта (27:29). Иккис баартыйаҕа Кытай кыргыттара арыый холкутук, 25:17 ахсаанынан инники түспүттэрэ. Үһүс баартыйаҕа олохтоохтор бастакы оонньууга курдук 3-0 ахсаанынан кыайыахтаахтар этэ да, Арассыыйа кыргыттара хомуна-дьиминэ туттан, тэтимнэрин эбэн 29-27 ахсаанынан кыайыыны төлө туттарбыттара. Төрдүс баартыйаҕа эмиэ кыайыыны ситиһэн (25:18) ахсааны тэҥнииллэр (4:4).

Быһаарыылаах, бэһис баартыйаҕа 15 очукуону бастакынан ылбыт хамаанда кыайар. Манна Арассыыйа хамаандата кыл-мүччү 2 эрэ очукуонан баһыйтарар. Онон кыргыттарбыт “World Super 6” турнир үрүҥ көмүс мэтээллэринэн наҕараадаланаллар. Оттон уопсай түмүк маннык буолла: 1 – Кытай; 2 – Арассыыйа; 3 – Украина; 4 – Япония; 5 – Индонезия; 6 – Казахстан.

82893d02 83e9 40a0 b189 1a62b4aba57f

– Казахстан уонна Индонезия сүүмэрдэммит хамаандаларын кытта оонньууларга мин сүрүн састаапка оонньообутум, – диэн кэпсиир биир дойдулаахпыт, Сунтаар Кэмпэндээйититтэн төрүттээх Алена Дмитриева, – оттон Украина уонна Кытай (финалга) хамаандаларын кытта күөн көрсүһүүлэргэ оонньооччулары солбуйууга тахсыталаабытым. Кытайдары кытта олус эриһиилээх, тыҥааһыннаах оонньуу буолла. Дьиктитэ диэн Чэнду олохтоохторо биһиги хамаандабытыгар да, утарылаһааччыларбытыгар да тэҥинэн ыалдьыбыттара.

Бу турнир – аан дойду чөмпүйэнээтигэр бэлэмнэнии сүрүн түһүмэҕэ. Кулун тутарга үөрэтэр-эрчийэр тэрээһин Эмиэрикэҕэ ыытыллыбыта. Олорон эрэн оонньуур волейболга аан дойду чөмпүйэнээтэ от ыйын ортотугар Голландияҕа ыытыллыахтаах. Аан дойду улахан түһүлгэтигэр барыта 16 хамаанда кыттыахтаах. Бүгүҥҥү күҥҥэ аан дойду саамай күүстээх хамаандаларынан Эмиэрикэ, Голландия, Бразилия, Канада, Кытай уонна Арассыыйа сүүмэрдэммит хамаандалара буолаллар. Мин Арассыыйа хамаандатын сайаапкатыгар киллэриллибитим. Билигин Дьокуускайга кэлэн сынньанан баран Москубаҕа тиһэх үөрэтэр-эрчийэр тэрээһиҥҥэ барыахтаахпын.

“Кыым” ааҕааччыларын аатыттан Алена Дмитриеваҕа ситиһиилэри, кыайыылары-хотуулары баҕарабыт!

Федор РАХЛЕЕВ.

Тарҕат:

Ырытыыгын суруй

Защитный код
Обновить

Бүтэһик сонуннар