Войти

Войти

Сунтаар улууһугар волостной бибилэтиэкэ 100 сылыгар уонна ыам ыйын 27 күнэ Арассыыйа  бибилэтиэкэтин  күнүгэр анаммыт, Л.А.Попов аатынан Сунтаар киин бибилэтиэкэтэ өрөспүүбүлүкэтээҕи  аһаҕас хоһоон күрэһин кэтэхтэн тэрийэн ыытта.

Эрдэ  куйаар ситимин нөҥүө  ыытыллыбыт  балаһыанньа болдьоҕунан, ыам ыйын 19-25  күннэригэр үлэ түмүлүннэ. Манна  барыта киэҥ нэлэмэн Сахабыт сирин оройуоннарыттан:  Дьокуускай куораттан, Үөһээ  Бүлүүттэн, Мэҥэ Хаҥаластан, Нам, Ньурба, Дьааҥы, Томпо, Амма, Таатта, Чурапчы, Сунтаар улуустарыттан 43 үлэ киирэн  дьүүллүүр сүбэ   сыанабылын ааста. Дьүүллүүр сүбэ састаабын бэрэссэдээтэлинэн Норуоттар икки ардыларынааҕы Суруйааччылар сойуустарын чилиэнэ, СӨ суруйааччыларын сойууһун чилиэнэ, Сунтаартан маҥнайгы поэтесса Саргылана Семеновна Спиридонова – Кэрэмэс Кийиитэ буолла.  Ону таһынан СӨ култууратын туйгуна, ырыаһыт, мелодист Анна Фомична Тотонова, Сунтаар улууһун култууратын, айылгытын саламтатын сүрүннүүр исписэлииһэ, СӨ култууратын туйгуна Марианна Станиславовна Поскачина үлэлээтилэр. Күрэскэ киирбит хоһооннор бары даҕаны билиини-көрүүнү тарҕатар, сырдыгынан сыдьаайар бибилэтиэкэҕэ анаммыта сүрдээҕин үөрдэр уонна долгутар. Дьүүллүүр сүбэ быһаарыытынын “Кылаан кыайыылаах” үрдүк аатын ылла Дькуускай куорат олохтооҕо Вячеслав Хон, 1 миэстэ – Варвара Максимова –Тырымнаайы (Сунтаар); 2 миэстэ – Маргарита Заболоцкая – Чөмчүүк (Элгээйи); 3 миэстэ – Полина - Победа (Уус Алдан). Кылаан кыайыылаах хоһоонугар  матыып айыллан ырыа буолан тахсара  күүтүллэр,  маны сэргэ миэстэлэспит кыттааччыларга харчыннан бириэмийэ уонна өйдөбүнньүк бириистэр, хас биирдии кыттааччыга туоһу сурук туттарыллар. Анал биһирэбилинэн  Дьокуускай куорат олохтооҕо Антонина Христофорова – Хагдаанай бэлиэтэннэ. Хагдаанай Сунтаардааҕы оҕо бибилэтиэкэтигэр үлэлээбит Тамара Прокопьевна Рыбникова сырдык кэриэһигэр анабыл хоһооно бэлиэтэннэ. Бу киирбит хоһооннор бибилэтиэкэ сайтыгар тахсыахтара уонна сыл бүтүүтэ 100 сыллаах үбүлүөйбүтүгэр  “Билии дьиэтэ – бибилэтиэкэ” хомуурунньук  тахсара күүтүллэр.

Суруйда бибилэтиэкэ үлэһитэ Мария Алексеева

Тарҕат:

Добавить комментарий

Бүтэһик сонуннар