Дойду бэрэсидьиэнэ Владимир Путин “Барс-2” доброволецтар батальоннарын састаабыгар киирэр “Боотур-1” этэрээт хамандыыра Александр Гаврильевич Колесовка “Кыһыл Көмүс Сулус” мэтээли туттаран туран, Арассыыйа Дьоруойа үрдүк ааты иҥэрэр туһунан ыйааҕа таҕыста. Бу туһунан өрөспүүбүлүкэ күнүгэр “Өрөгөй” успуорт уораҕайыгар буолбут “ПОКОЛЕНИЕ-ТҮМҮҮ” үөрүүлээх тэрээһин кэмигэр Ил Дархан Айсен Николаев иһитиннэрбитэ.
Айсен Николаев “Боотур” хамандыырыгар Арассыыйа Дьоруойа үрдүк ааты иҥэрбиттэрэ, анал байыаннай эпэрээссийэҕэ кыайыыны ситиһэргэ өрөспүүбүлүкэ бүттүүн кылаатын билинии буолар диэн тоһоҕолоон бэлиэтээтэ.
“Саха сирин олохтоохторугар киэн туттан туран үөрүүлээх сонуну үллэстиэхпин баҕарабын. Арассыыйа Федерациятын Бэрэсидьиэнин ыйааҕынан, “Боотур” добровольческай этэрээт хамандыыра Александр Гаврильевич Колесовка “Арассыыйа Федерациятын Дьоруойа” үрдүк аат иҥэрилиннэ. Арассыыйа олохтоохторо элбэх омук тоҕуоруһан олорор норуота, ханнык баҕарар суудайыыны, кутталы биир сомоҕо буолан утары турарга бэлэмнэр”, – диэтэ Ил Дархан.
Арассыыйа Дьоруойа Александр Колесов: “Бу мин соҕотох ситиһиим эрэ буолбатах, бастатан туран, бу байыаннай дьайыыга сылдьар тыһыынчанан байыас ситиһиитэ буолар. Бар дьоммор түгэни туһанан махтанабын уонна Өрөспүүбүлүкэбит күнүнэн эҕэрдэлиибин”, — диэтэ.
Александр Колесов 90-c сылларга Приднестровье иирсээнигэр уонна Чечня бастакы сэриитигэр кыттыбыта, онно “Хорсунун иһин” мэтээлинэн наҕараадаламмыта. 2022 с. муус устарыгар диэри Александр Колесов А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр үлэлээбитэ.
Александр Колесов байыаннай иэһин толоро сылдьан, хорсуннук бойобуой соругун толорон эрэ буолбакка, өстөөх уотуттан бойобуой табаарыстарын быыһаабыта. Кини Арассыыйа Сэбилэниилээх күүстэрин 50 байыаһын өлөр өлүүттэн быыһаан таһаарбыта уонна бэйэтинэн өстөөх бойобуой тиэхиньиктэн суулларан, кинилэр күүстэрэ биллэ мөлтүүрүгэр хорсун быһыыны оҥорбута.
“Боотур” хамандыыра Александр Колесов көдьүүстээхтик тааҥканан көмүскэниини тэрийбитэ, тэҥинэн бойобуой быһыы-майгы туһунан аармыйа ыстаабыгар чуолкай иһитиннэриилэри биэрэ олорбута. Ахсаан өттүнэн алта төгүл куоһарар өстөөх Арассыыйа Сэбилэниилээх күүстэрэ сытар сэлиэнньэлэрин төгүрүктээри гыммыта. Онуоха Александр Колесов кэмигэр оперативнай быһыы-майгы туһунан биллэрбит иһитиннэриитин көмөтүнэн, итиэннэ көмүскэниигэ көдьүүстээх дьайыылары тэрийиитинэн, хорсун быһыытынан суһаллык эвакуация тэриллибитэ.
Санатан эттэххэ, «Боотур» өрөспүүбүлүкэтээҕи добровольческай этэрээти тэрийии туһунан быһаарыы былырыын бэс ыйыгар ылыллыбыта. Этэрээт байыастара байыаннай эпэрээссийэҕэ барбыттара. Кинилэр «Барс» иккис этэрээтигэр киллэриллибиттэрэ уонна Харьков уобалаһыгар байыаннай соруктары толорбуттара. Хамандыырынан Александр Колесов анаммыта.
Бэйэ кэр.
