Арассыыйа ыксаллаах быһыыга-майгыга министиэристибэтин Саха сиринээҕи управлениетын салайааччыта Павел Гарин Халыма бөлөх улуустарыгар Халыма өрүстэн уонна киин улуустарга Өлүөнэ өрүстэн региональнай таһымнаах ыксаллаах быһыы-майгы үөскүөн сөп диэн иһитиннэрдэ.
Кини этэринэн, бу сабаҕалааһын 70 % туолар кыахтаах. Ордук ыксаллаах быһыы-майгы Өлүөхүмэ улууһугар Өлүөнэ өрүстэн, Усуйаана уонна Дьааҥы улуустарыгар Дьааҥы өрүстэн үөскүүр сибикилээх.
Ууга барар кутталлаах зонаҕа Амма, Чурапчы, Таатта, Мэҥэ-Хаҥалас, Горнай, Хаҥалас, Алдан, Уус Майда, Томпо, Уус Алдан, Бүлүү, Өймөкөөн, Аллараа Халыма, Анаабыр улуустарын нэһилиэнньэлээх пууннара киириэхтэрин сөп. Бу сабаҕалааһын 60% туолар кыахтаах.
Өлүөнэ өрүс Кангаласс – Нам учаастагар муус халыҥыттан харыы үөскүөн сөп. Эбээн-Бытантай улууһугар Кыһыл Балыктах уонна Күөгүлүүр күөллэр халаанныыр кутталлаахтар. Ол уу долгуна намтал сиринэн Баатаҕай Алыытын нэһилиэнньэлээх пууннарыгар тиийиэн сөп.
Билигин региоҥҥа халааны сэрэтэр үлэ, даамбалары бөҕөргөтүү, нэһилиэнньэҕэ өйдөтөр үлэни ыытыы тэтимнээхтик бара турар, мууһу эстэрээччилэр уонна быыһааччылар бэлэм сылдьаллар.
Сонун төрдө: РФ Ыксаллаах быһыыга-майгыга министиэристибэтин Саха сиринээҕи управлениетын пресс-сулууспата
