Марина Ивановна Атласова

Алакыайа ынаҕым

Урааҥхайбыт уруйунан
Утуммутун салҕааммыт
Ураа муостааҕы иитэммит
Уйгу-быйаҥы уһансабыт.

Самаан сайын ситиитэ
Сайылыкка көһөбүт
Сирэм күөххэ үктэнэн
Саламаны ыйыыбыт.

Түптэ унаар буруота
Туман буолан туналыйар
Сайыҥҥы күммүт сылааһа
Салгыҥҥа сайа тарҕанар.

Торбосторбут толооннорго
Торолуйа сүүрэллэр
Мэччирэҥҥэ ынахтарбыт
Минньиргэтэн аһыыллар.

Ача күөхтээх Алачааммар
Алакыайа ынаҕым
Алаастарын ахтыбыттыы
Анаарыччы көрүтэлиир

Ыамныыр кэмин көтүппэккэ
Ыҥыранан кэлэр, Алакыайам
Үүттүгэннээх сүөгэйинэн
Үрүҥ аспыт дэлэйэр.

Алакыайа ынаҕым
Ааттын да амарах
Чэгиэн олохпутун чэлгитэн
Төрүөҕүнэн төлкөлүүр.

Кыынньар кымыс алгыһынан
Үлэбит көдьүүстээх
Өбүгэбит үгэһинэн
Үлэбит үйэлээх

Муома улууһа, Буор Сыһыы бөһүөлэгэ.