«Ситим» медиа-бөлөх «Кыым.ру» аан ситимэ Аҕам саастаах дьон күнүн көрсө Сахабыт сиригэр көхтөөх уһун үйэлэниини көҕүлүүр уонна саҥа олохтоммут «Саха сирин рекордун кинигэтигэр» претендент булар соруктаах «Ытык кырдьаҕас» күрэһи биллэрбитэ. Ол түмүгүнэн барыларыттан аҕа саастаах Аарыма кырдьаҕас «Саха сирин рекордун кинигэтигэр» уһун үйэлээх быһыытынан претендент буолуохтаах.

Сүрүн ирдэбилинэн кыттааччы 90 сааһын туолбут буолуохтаах, электроннай почтаҕа хаартыскатын уонна олоҕун кэпсээнин ыытыахтаах этэ. Сайаапкалары ылыы икки нэдиэлэ кэриҥэ барда. Кырдьаҕастарга оҕолоро, сиэннэрэ, үлэлээбит тэрилтэлэрэ көмөлөстүлэр. Күрэс туһунан бастакынан «Кыым» хаһыаты сурутааччылар уонна социальнай ситимнэрбитин ааҕааччылар билбиттэрэ саарбаҕа суох.Онон, кыттыгастаах дьоҥҥо барыгытыгар барҕа махтал!

Дьэ, күрэс түмүгүнэн, ирбэт тоҥҥо, тыйыс сиргэ олорон, уһун үйэлээх омук буоларбытын бигэргэттибит диэххэ сөп . Биһиэхэ тоҕуһуон сааһын ааспыт 23 ытык кырдьаҕас уонна сүүс сааһын ааспыт 5 аарыма кырдьаҕас сайаапка ыытта. Кинилэри барыларын аан ситиммитигэр таһаардыбыт. Онон, ытык кырдьаҕастарбытын киирэн кэрэхсээҥ, үтүө тылгытын анааҥ, санааҕытын суруйуҥ.

Санатар буоллахха, «Ситим» медиа-бөлөх Сахабыт сирин уһулуччу көрдөрүүлээх дьонун, чахчыларын, тэрээһиннэрин үйэтитэр соруктаах «Саха сирин рекордун кинигэтин» олохтообута. Кинигэ бастакы «Хортуосканы аһаҕас уокка саамай элбэх киһи кыттыылаах ыһаарылааһын» диэн рекорда балаҕан ыйын 17 күнүгэр Хаҥалас улууһун Булгунньахтаах сэлиэнньэтигэр олохтоммута. Манна барыта 168 киһи кыттан, тэрээһин Булгунньахтаах хортуоскатын киэҥ эйгэҕэ тарҕатар, нэһилиэк аатын ааттатар, оҕуруоччуттар сыралаах үлэлэрин түмүгүн көрдөрөр, дьону түмэр сүрүн соругун сиппитэ.

Тэрийэр бөлөх.