Бүгүн, балаҕан ыйын 3 күнүгэр, СӨ Үрдүкү Суутугар Набережнайдааҕы биир мандааттаах быыбардыыр уокуруктан Ил Түмэҥҥэ киирсэр Игорь Синченко утарсааччытыгар Мария Христофороваҕа түһэрбит модьуйуутун көрдүлэр.
Санатар буоллахха, дьокутаат мандаатын иһин, 6-с №-дээх Набережнайдааҕы биир мандааттаах быыбардыыр уокуруктан Мария Христофрова (“Гражданскай платформа”), Игорь Синченко (ЛДПР) уонна Игорь Никитин (“Биир ньыгыл Арассыыйа”) тураллар.
Игорь Синченко Мария Христофорова быыбар иннинээҕи хаһыатыгар тахсыбыт ноутбуктаах олорор хаартыскатыгар Apple фирма табаарынай бэлиэтэ көстөрүн иһин суукка үҥсүбүтэ.
Маннык була сатаан матыыптаан, суукка үҥсэн кандидаты туората сатааһын – саҥа көстүү. Ол гынан баран, бу хаартыскаҕа көстөр ноутбук – суруналыыс, СМИлэри тэрийэн таһаарааччы үлэлиир инструмена буолар, ханнык да кэмиэрчэскэй дуу, эбэтэр атын сыаллаах туһаныллыбатаҕа чуолкай.
СӨ Үрдүкү Суута Синченко түһэрбит модьуйуутугар аккаастаата. Кырдьык үрдүгэр сымыйа ыттыбат буоллаҕа.
Инньэ гынан, Мария Христофорова салгыы быыбарга киирсэр.
