Мария Дмитриевна Пермякова 91 саастаах
-
-
1932 с. ахсынньы 10 күнүгэр Чурапчы улууһун Мугудай нэһилиэгэр Евдокия Ивановна, Дмитрий Максимович Пермяковтарга үһүс оҕонон төрөөбүтэ.
«Сайдыы» колхуоска ыанньыксыт ийэтин батыһан, кыра эрдэҕиттэн хотоҥҥо сүөһү үлэтигэр сылдьыбыта. Атах сыгынньах оҕо сааһыгар сып-сылаас ынах оннун сылаанньытар абылаҥын, торбоско быһыта үктэтии абытайын билэн улааппыта. Олоpop алаастара ырааҕынан, дьиэлэнэр ыал көстүбэтинэн, ийэлэрэ эдэр сааһыгар өлбүтүттэн тэптэрэн, оскуолаҕа күттүөннээхтик үөрэммэтэҕэ. Онон колхуос үлэтигэр эриллэн улааппыта.
Кэргэн тахсыан иннинэ 1945-1955 сс. «Сайдыы» колхуоска Мара, Холболоох фермаларыгар ыанньыксыттаабыта. 1955 с. Сивцев Прокопий Дмитриевичка кэргэн тахсан, Дьокуускайга сүктэн киирбитэ. Аҕыс сыл устата биэс оҕону төрөтөн баран, 1963 сылтан кирпииччэ собуотугар өр сыл үлэлээбитэ. Онтон таас дьиэ тутуутугар рабочайынан, малярынан, кирпииччэ истиэнэни таһаарааччыга тиийэ үлэлээбитэ.
Куоракка олорор кэмигэр Мугудайын, төрөөбүт нэһилиэгин дьоно киирэн түhэр-хонор, маанылатар-күндүлэтэр дьиэлэрэ, тирэх оҥостор ыаллара буолбуттара. Үөрэххэ киирээччи ыччат Сиипсэптэр нөҥүө ааһаллара, наада буоллаҕына дьукаах олороллоро. Онон үөрэхтэммит Мугудай ыччата Маайа сылаас дьиэтин, минньигэс чэйин-аһын бары билэн ааспыттара. Ол курдук, Оконешников И.Е., Толстоухов Д.Д., Сивцев И.Н., Пермяков А.М., Толстоухов В.М., Коротких Е.Ф., Федорова-Сивцева А.М. уо.да атыттар.
1993 сыллаахха төрөөбүт дойдутугар Чурапчы улууһун Мугудай нэһилиэгэр тахсан 85 сааһыгар диэри сүөһү-ас ииттэн, үүт туттаран олордо. Сайын аайы оҕолорун, сиэннэрин тыа сиригэр үөрэтэн, сайылатан, от оттуур, мас мастыыр курдук үлэлэргэ такайан кэллэ.
Ол да иһин икки сиэн кыргыттара Сивцева М.А. «Якутлесресурс» Чурапчытааҕы филиалыгар дириэктэр, Сивцева М.А. Төлөй нэһилиэгин хореограба уонна уопсастыбанньыга Чурапчы улууһугар олохсуйан олороллор, уол сиэнэ Сивцев А.А. – Чурапчытааҕы физкультура университетыгар, Д.П. Коркин аатынан оскуолаҕа күүс-уох, эт-хаан өттүнэн cүбэһит буолар.
Мария Дмитриевна, 91 хаарыгар сырыттар, барыларыгар сүбэ-ама буолар. 5 оҕолоох, 13 сиэн, 18 хос, 2 хос-хос сиэн эбээтэ. Оҕолорун, сиэннэрин кытта тэҥҥэ айылҕаҕа сылдьан сир астыыр, иллэҥ кэмигэр иистэнэр, баайар, хас биирдии күнүн туһалаахтык атаарар.
Хас да пятилетка үлэҕэ ударнига, Чурапчы улууһун Мугудай нэһилиэгин Бочуоттаах олохтооҕо, СӨ Ытык кырдьаҕаһа.
Санааҕын суруй