Матрена Семеновна Гоголева 101 саастаах
-
-
Саха АССР төрүттэммит 1922 сыл тохсунньу 15 күнүгэр Уус Алдан улууһун Бэрт Ууһун нэһилиэгэр күн сирин көрбүтэ. Өрөспүүбүлүкэ 100 сылыгар 100 сааһын томточчу туолбута.
Дьокуускай педучилищетын алын кылаастары үөрэтэр 2-с кууруһун бүтэрбит сайыныгар 1942 сыллаахха, Аҕа дойдуну көмүскүүр сэрии саамай үгэнигэр, аҕатын Гоголев Семен Самсоновиһы фроҥҥа ыыппыттара. Кини 6 кыыһа (саамай улаханнара Матрена 20 саастааҕа) уонна ыарыһах ийэлэрин кытта бэйэлэрэ хаалбыттара. Онон кыһалҕаттан үлэлииригэр тиийбитэ.
Учуутал олох тиийбэт буолан, РУНО быһаарыытынан учууталлата ыыппыттара. Бастакы сылыгар – Хоро (Чараҥ) оскуолатыгар, онтон иккис сылыгар – Танда оскуолатыгар. Ити сайын 1943 с. Мүрүгэ улууска аан бастакынан сэриигэ барбыт аҕалаах оҕолорго 25 миэстэлээх оҕо уһуйаанын иккиэ буолан аспыттара. Билигин ол оҕо уһуйаана 75 миэстэлээх «Кэскил» диэн Бороҕоҥҥо саҥа тутуллубут дьиэҕэ үлэлии турар.
Аҕаларын туһунан 1943 с. тохсунньутугар «Орел куорат анныгар кыргыһыыга өллө» диэн сурук кэлбитэ. 1944 с. Бороҕоҥҥо Мүрү орто оскуолатыгар алын кылаас оҕолорун учууталынан киирбитэ. Ийэлэрэ өлөн хаалан (биир сылынан аҕам барбытын кэннэ ыалдьан өлбүтэ), түөрт балтыларын бэйэтэ иитэн улаатыннаран, биир дьиэттэн ыал буолан барбыттара.
Мүрү орто оскуолатыгар үлэлиир сылларыгар уопсастыбаннай үлэҕэ көхтөөхтүк үлэлээбитэ: 1966-68 сс. ССКП кэмитиэтин чилиэнинэн, 12 сыл идэлээх сойуус казначейынан. Онтон оройуон народнай суутугар икки сыл народнай сэтээтэллээбитэ. Уопсай педагогическай ыстааһа – 44 сыл. Биэнсийэҕэ тахсан дойдутугар Бороҕоҥҥо олорор.
Кэргэнэ Слепцов Алексей Николаевич 43 сыл ыстаастаах история учуутала, сэрии бэтэрээнэ этэ. 1942 с. сэриигэ барбыта, 1944 с. 2 гр. инбэлиит буолан кэлбитэ. 1952 сыллаахтан ССКП чилиэнэ, РСФСР үөрэҕириитин туйгуна, 1981 с. ыалдьан өлбүтэ. 4 оҕолоро бары үөрэхтэнэн, элбэх оҕолонон, сиэннэнэн биэнсийэҕэ тахсыбыттар. Оҕолоруттан 2 оҕо, 2 сиэн учууталлар, бииргэ төрөөбүт балта – иитээччи, ол иһин «Педагогтар династиялара» диэн ааты 2002 сыллаахха иҥэрбиттэрэ.
Матрена Семеновна Уус-Алдан Бороҕонугар буолбут бастакы Кыайыы ыһыаҕын кыттыылааҕ. Оччолорго 23 саастаах эдэркээн кыыс салама ыйыы турар каадырдара ол ыһыах киинэтигэр тиһиллэн хаалбыттар (бу сигэнэн киирэн көрүөххэ сөп https://ysia.ru/video-pervyj-ysyah-pobedy-v-ust-aldanskom-uluse-1945-goda/ ).
Наҕараадалара:
• «За доблестный труд в ВОВ 1941-1945 сс.»
• «Ветеран труда», 1975 с.
• «За трудовое отличие», 1954 с.
• «Отличник народного просвещения РСФСР», 1967 с.
• «Ветеран ВОВ» - 2005 с.
• «Почетный старейшина РС (Я) «Ытык сүбэ», 2005 с.
• Мүрү нэьилиэгин бочуоттаах олохтоҕо, 2002 с.
• «Учитель учителей РС(Я)»
• «Почетный ветеран системы образования РС (Я)»
• «Почетный житель Усть-Алданского улуса (района)»
• Почетный знак долгожителя РС (Я) «Үйэ саас», 2022 с.
Санааҕын суруй