Ааспыт икки нэдиэлэ иһигэр Саха сиригэр 167 киһини клещ ытырда. Онтон 25-һэ – оҕо. Ити туһунан Роспотребнадзор Саха сиринээҕи салаата иһитиннэрэр.
Ол курдук, ити ыйыллыбыт кэм иһигэр “клещ ытырда” диэн Ленскэй улууһугар 47, Алдаҥҥа – 46, Нерюнгрига – 35, Өлүөхүмэҕэ – 11, Дьокуускай куоракка – 10, Хаҥаласка – 5, Сунтаарга уонна Аммаҕа – 3-түү, Ньурбаҕа уонна Уус Алдаҥҥа – 2-лии, Чурапчыга, Бүлүүгэ уонна Кэбээйигэ – 1-дии киһи балыыһаҕа кэлэн көрдөрүммүт.
Лабаратыарыйа чинчийиилэрэ көрдөрбүттэринэн, Мииринэйгэ уонна Мэҥэ Хаҥаласка энцефалиттаах үөннэр бааллара биллибит. Итини таһынан, Алдаҥҥа, Мэҥэ Хаҥаласка, Өлүөхүмэҕэ, Ленскэйгэ, Мииринэйгэ, Нерюнгрига уонна Сунтаарга барыта 12 клещ боррелиозтааҕа быһаарыллыбыт. Аны туран, Мииринэйтэн уонна Нерюнгриттан “гранулоцитарнай анаплазмоз” диэн ыарыылаах үөннэри булбуттар.
Онтон сылтаан Алдан, Амма, Горнай, Үөһээ Бүлүү, Бүлүү, Ленскэй, Өлүөхүмэ, Нам, Ньурба, Нерюнгри, Сунтаар, Чурапчы, Хаҥалас улуустарыгар уонна Дьокуускай куоракка дьон элбэхтик сылдьар, тоҕуоруһар сирдэрин эмтээн эрэллэр.
Роспотребнадзор үлэһиттэрэ сэрэхтээх буоларга, клещ ытырбытын биллэххитинэ, эмтэнэр тэрилтэҕэ көрдөрөргө ыҥыраллар.
