Мантан антах күнүһүн халлааммыт күн аайы сылыйан иһиэхтээх.
Саха сиригэр быйыл кулун тутар ичигэс буолар чинчилээх. Ол курдук, арҕааҥҥы улуустарга күнүһүн, ортотунан, -8, киин улуустарга -15 кыраадыс тымныы буолуохтаах. Ол туһунан Саха сиринээҕи Гидрометкиин салайааччыта Татьяна Маршалик кэпсиир.
“Бу нэдиэлэ бүтүөр диэри Саха сирин үгүс улууһугар халлаан чуумпу, улахан сөҥүүтэ суох. Өрөбүллэргэ киин улуустарга соҕуруулуу-илинтэн кыра хаар кэлиэҕэ. Күн аайы халлааммыт сылыйан иһиэҕэ. Киин улуустарга түүнүн -32-37, сорох күн -30 кыраадыс буолара күүтүллэр. Күнүһүн салгын үчүгэйдик сылыйыаҕа. Өскөтүн бүгүн күнүс -22-24 кыраадыс эбит буоллаҕына, өрөбүллэргэ -15-17 кыраадыска тиийиэҕэ. Өрөспүүбүлүкэ арҕааҥҥы улуустарыгар – Мииринэйгэ, Ленскэйгэ уонна Өлүөхүмэҕэ – өссө сылыйыа – онно -8-13 С буолара күүтүллэр”, – диэн Т.Маршалик быһаарар.
Кини этэринэн, бүгүн, ол эбэтэр олунньу 28 күнүгэр, саамай намыһах температура Өймөкөөн улууһугар бэлиэтэммит – 48 С. Оттон Арктика кытылыгар ханна даҕаны тыал уҕарыахтаах.
“Бэҕэһээ Тиксиигэ тыал сөкүүндэҕэ 39 миэтэрэ түргэнник үрбүтэ. Ол гынан баран, киэһэттэн тыал уҕараан барыахтаах”, – диир синоптик.
СИА хаартыската.
