Дьокуускайга халлааммыт эмиэ тымныйар, дьиҥнээх бэйэтин кэмигэр дьүөрэлии киэбин кэтэр буолбутун туһунан Гидрометкиин салайааччыта Татьяна Маршалик иһитиннэрэр.
“Бу нэдиэлэҕэ халлааммыт сыыйа бэйэтин киэбигэр киирэн, түүнүн 25 – 30 кыраадыска тиийэ тымныйыаҕа. Ол гынан баран, күнүс халлааммыт -14 – 19 кыраадыска диэри сылыйыа. Уопсайынан, сыыйа-баайа халлаан бу сылыйыы иннинээҕи таһымыгар түһүөҕэ эрээри, нуорматтан син биир үрдүк буолуоҕа. Кулун тутар – кыһын уонна саас икки ардынааҕы, халлаан уларыйар ыйа. Онон, “кулун тутар – бастакы сааскы ый” диир эмиэ табыллыбат. Биһиги сааспыт өссө да кэлэ илик. Түүнүн кыһыҥҥылыы турар. Холобур, хотугулуу-илиҥҥи улуустарга түүнүн -45 кыраадыска кытта тиийэр. Сааскы ый диэн муус устары этиэххэ сөп”, – диэн идэлээх метеоролог этэр.
Татьяна Маршалик бэлиэтээбитинэн, кулун тутар ыйга муҥутаан 1981 сыллаахха Өлүөхүмэ улууһугар сылыйа сылдьыбыттаах. Онно 16 чыыһылаҕа халлааннара +14,5 кыраадыска диэри сылыйбыт. Онтон бэттэх оннук сэдэх көстүү ханна да хатылана илик.
Хаартыска: NEWS.YKT.RU
