Быйыл Саха сирин өрүстэрэ урукку сыллартан бэрт кыратык, биир – икки күн хойутаан, эстиэхтэрин сөп диэн сылыктыыллар. Ол туһунан МЧС Саха сиринээҕи салаатын Сүрүн управлениетын салайааччыта Павел Гарин ТАСС-ка кэпсээбит.
Өлүөнэ өрүс Дьокуускай куоракка диэри кэрчигэ, ону таһынан Алдан, Амма уонна Бүлүү өрүстэр быйыл ыам ыйын иккис декадатыгар эстиэх курдуктар. Ыам ыйын үһүс декадатыгар Өлүөнэ, Алдан, Бүлүү алын тардыылара уонна өрөспүүбүлүкэ хотугу, хотугулуу-илиҥҥи өрүстэрэ хамсыахтара. Бэс ыйын саҥатыгар – өрүстэр байҕалга түһэр төрдүлэрэ барыаҕа.
“Сүрүн өрүстэргэ халаан уутун муҥутуур таһыма урукку орто көрдөрүү таһымынан уонна урукку орто көрдөрүүттэн 0,5 – 1,5 м үрдүк буолара күүтүллэр. Муус хардаҕына, уу таһыма кутталлаах кирбиини куоһаран, хочолорго тахсан, намтал сиргэ турар нэһилиэнньэлээх пууннар кытылларын ылыан сөп”, – диэн Павел Гарин этэр.
Суруйалларынан, быйыл Саха сиригэр муус 56 сиргэ харыан сөп. Сүрүннээн, Өлүөнэ уонна Алдан өрүстэргэ.
