Дьокуускай куоракка хаар өссө үс күн кэлэ-кэлэ түһүөҕэ, ол түмүгэр ыйдааҕы нуорманы балтараа – икки төгүл куоһарыан сөп. Ол туһунан Гидрометкиин Саха сиринээҕи салаатын метеорология уонна агрометеорология билгэлэрин отделын салайааччыта Саргылаана Никитинэ кэпсиир.
“Дьокуускайга сөҥүү ыйдааҕы нуормата 6 миллимиэтир буолар. Ол эрээри, биир күн иһигэр, кулун тутар 21 күнүгэр, 5 миллимиэтир хаар түспүтэ. Ыйдааҕы нуормабыт туолбута. Онно эбии бу кэлэр үс күҥҥэ 2 – 5 миллимиэтирдээх хаар түһэрин күүтэбит”, – диир метеоролог.
Кини этэринэн, хаардаах тыал Дьокуускай куоракка өрөспүүбүлүкэ арҕааҥҥы улуустарыттан циклону кытта кэлиэтээх. Салгын нуорматтан сылаас буолуохтаах.
Бу күннэргэ дьокуускайга халлааммыт хайдах буолуоҕай?
Кулун тутар 27 күнэ. Түүнүн кыраһалыаҕа, сарсыарда уонна күнүс хаардыаҕа. Хотугулуу-арҕааттан 3 – 8 миэтэрэ түргэннээх тыаллаах буолуо. Түүнүн -11 – 13, күнүһүн – -2 – 4 кыраадыс тымныы.
Кулун турар 28 күнэ. Түүн кыраһалыаҕа, күнүс хаардыаҕа. Тыалбыт түүн соҕурууттан, оттон күнүһүн соҕуруулуу-арҕааттан сөкүүндэҕэ 5 – 10 миэтэрэ түргэннээхтик үрүө. Салгын кыраадыһа түүнүн -14 – 16, күнүһүн – -4 – 6 тымныы.
Кулун тутар 29 күнэ. Күнүс кыралаан хаардыаҕа, тыалбыт арҕааттан 4 – 9 миэтэрэ түргэннээхтик үрүөҕэ. Түүнүн -12 – 14, күнүһүн -5 – 7 кыраадыс тымныы буолара күүтүллэр.
“Өрөбүллэргэ хаар тохтуо диэн сылыктыыбыт, салгын баттааһына түргэн тэтимнээхтик үрдээн иһиэҕэ. Күнүһүн, быһа холоон, -5 – 9 кыраадыс тымныы буолуоҕа, ити – нуормаҕа чугаһыыр көрдөрүү. Билигин биһиги нуормабыт – “минус” 7 кыраадыс”, – диэн Саргылана Никитина эбэн эттэ.
