Дьааҥы улууһугар ойуур баһаарын умулларыыга күн-дьыл туруга эрэ буолбакка, олохтоох дьаһалта интэриэһэ суоҕуттан сытыырхайар диэн экология министиэристибэтин тыаны харыстааһын уонна кэтээн көрүү департаменын салайааччыта Владимир Иванов иһитиннэрдэ. Бу туһунан министиэристибэ саайтыгар баар.
Экология министиэристибэтэ этэринэн, ыам ыйын 7 күнүгэр Дьааҥы улууһун баһылыгар Гаврил Чириковка ойуур харыстабылыгар сокуону кэһии табыллыбатын туһунан сурук ыыппыттар. Оччолорго Дьааҥы улууһугар 9500 га сиргэ 162 термоточка бэлиэтэммит эбит. Ити туох да хонтуруола суох өртөөһүнтэн сылтаан тахсыбыт. Оттон сокуон этэринэн, өртөөһүн кытаанахтык бобуллар. Маныаха улуус дьаһалтата баһаар тахсарын сэрэтиигэ уонна профилактикаҕа туох да миэрэни ылбатах, инньэ гынан бу улууска ойуур умайыытыгар балаһыанньа сытыырхайбыт диэн министиэристибэҕэ бэлиэтииллэр.
Бүгүн саарсыарда Дьааҥы улууһугар 13 тыһ. га сиргэ 4 ойуур баһаара бэлиэтэммит. Ордук ыарахан балаһыанньа Бөтөҥкөс нэһилиэгин чугаһыгар үөскээбит. Бэҕэһээ манна нэһилиэктэн баара-суоҕа 5 км сиргэ баһаары умулларбыттар.
