Бу күннэргэ РФ Айылҕа харыстабылыгар миниистирин бирикээһин чэрчитинэн “Өлүөнэ турууктара” национальнай паарка” тэрилтэ устааба бигэргэннэ.
Онно сурулларынан, тэрилтэ сүрүн үлэтэ-хамнаһа манныкка туһуланыахтаах: национальнай паарка иһигэр киирэр айылҕа комплексын, ураты сири-уоту, түөлбэни, устуоруйа-култуура эбийиэктэрин харыстааһыҥҥа, чөлүгэр түһэриигэ, сөргүтүүгэ, дьону-сэргэни сырдатыыга, билим үлэтин-хамнаһын ыытыыга, кэтээн көрүүгэ, ону тэҥэ сынньанар уонна туристыыр усулуобуйаны тэрийиигэ.
Санаттахха, РФ Бырабыыталыстыбатын Бэрэссэдээтэлэ Дмитрий Медведев паарканы тэрийэр туһунан дьаһалы былырыын атырдьах ыйын 6 күнүгэр таһаарбыта. Онон “Өлүөнэбит турууктара” РФ Айылҕа харыстабылын министиэристибэтин бас билиитигэр киирбитэ.
