2019 сылга “Уһук Илиҥҥи гектар” бырагырааммаҕа 11,5 тыһ тахса киһи киирбит. Инньэ гынан, сир ылааччы ахсаана 18 %-нан, ол аата 76,6 тыһ киһиэхэ диэри элбээбит. Бу туһунан Уһук Илиҥҥигэ киһи хапытаалын сайыннарар ааҕыныстыба пресс-сулууспата иһитиннэрэр.
“2019 сылга “Уһук Илиҥҥи гектар” бырагыраамманан 11,5 тыһ тахса киһи сир учаастактарын ылла. Бу сирдэр уопсай иэнэ 7,1 тыһ гаҕа тэҥнэһэр. Бырагыраамма үлэлиирин тухары 76,6 тыһ киһи сир ылбыт. Ол уопсай иэнэ 53,7 тыһ га буолар. Бу Новосибирск эбэтэр Самара куораттар иэннэригэр тэҥнэһэр”, — диэн Уһук Илиҥҥигэ киһи хапытаалын сайыннарар ааҕыныстыба пресс-сулууспата бэлиэтиир.
Ордук Приморьеҕа сир ылбыттар. Ол курдук, манна 21 тыһ киһи бырагырааммаҕа киирбит. Иккис миэстэҕэ Саха сирэ, манна 13,6 тыһ киһи (18 %) сир ылбыт. Оттон үһүс – Хабаровскай кыраай. Манна 11,9 тыһ киһи (15,5 %) сирдэммит. Бырагыраамма кыттыылаахтарын улахан аҥара (85 %) Уһук Илиҥҥи уокурук олохтоохторо буолаллар.
Бырагыраамма атырдьах ыйын 1 күнүттэн Забайкальскай кыраайга уонна Бурятияҕа үлэлиир. Бу эрэгийиэннэр Уһук Илиҥҥи федеральнай уокурук састаабыгар 2018 сыл сэтинньи ыйыгар киирбиттэрэ. Ааҕыныстыба пресс-сулууспата иһитиннэрэринэн, Бурятияҕа 1 тыһ, Забайкальеҕа 1,6 тыһ киһи сир ылбыт.
Сайабылыанньа биэрбит дьон аҥара (54 %) олорор дьиэ туттар сыаллаах бырагырааммаҕа кыталлар. Оттон хас төрдүс киһи (23 %) тыа хаһаайыстыбатыгар, хас онус киһи (9 %) туристическай салааҕа үлэлэһэр былааннаах. Сир ылааччы 7 % подсобнай хаһаайыстыба тэринээри, маҕаһыын, аһыыр сир, тэхиньиичэскэй киин уо.д.а. арынар былааннаахтар.
Бырагыраамма туһунан
“Уһук Илиҥҥи гектар” бырагыраамма көмөтүнэн Арассыыйа олохтоохторо Уһук Илиҥҥи уокурукка 1 га сир учаастагын буор-босхо ылыахтарын сөп. Бырагыраамма Уһук Илиҥҥи уокурук олохтоохторугар 2016 сыл бэс ыйын 1 күнүттэн үлэлиир. Оттон атыттарга – 2017 сыл олунньу 1 күнүттэн. Бырагыраамма кыттыылааҕа бастакы сылыгар сирин хайдах туһанарын быһаарыныахтаах. Үс сылынан декларациялыыр, онтон биэс сылынан сирин бэйэтин бас билиитигэр эбэтэр уһун болдьоххо түүлэһэн ыларга оҥотторуохтаах..
