Болугур нэһилиэгин олохтооҕо, өр сыл орто оскуолаҕа учууталынан үлэлээбит Альбина Васильевна Павлова сыл аайы кулун тутарга-муус устарга бастакы оҕурсутун амсайар. Быйыл да ол үгэһин кэспэтэ.
“Бастакы амсайар оҕурсубун олунньуга олордобун түннүккэ. Онтум саас эрдэ ас кутан амсайабыт. Түннүк сырдык улахан буоллаҕына оҕурсу үчүгэйдик үүнэр. Быйылгы суордум «Балконнай» диэн. Эрдэ ситэр, кыра иһиккэ үүнүөн сөптөөх суорт”, – диэн этэр сатабыллаах хаһаайка. Альбина Васильевна тарбаҕар талааннаах үүнээйи үүннэрээччи буолан, сайын аайы олбуора сибэкки арааһынан киэркэйэр, оҕуруот аһын арааһын олордор.
Бу курдук тыа сирин үлэһит дьоно сааскы түбүктэрэ саҕаланан, ол түбүктэрин бастакы түмүктэрэ сүрэҕи үөрдэллэр.
