Ол да буоллар муус харыыта баар. Бөлүүн түүн Дьокуускай куорат гидропоһун аттынан Эбэ уута кутталлаах кирбииттэн түспүтэ бэлиэтэммит.
Ыам ыйын 15 күнүгэр сарсыарда 07.00 чааска уу таһыма 816 см (кутталлаах кирбии 827 см) буолбут диэн, куораттааҕы суһал ыстаап иһитиннэрэр.
“Хангалааска уу таһыма икки чаас иһигэр 47 см – 953 см түспүт (кутталлаах кирбии 1000 см). Табаҕаҕа 3 см – 921 см (кутталлаах кирбии 970 см), оттон Тулагыга 6 см — 1040 см (кутталлаах кирбии 1115 см) түспүтэ бэлиэтэнэр”, — диэн иһитиннэриигэ суруллар.
Дьокуускай аннынан муус харыыта баар. Хангалааска муус ортоһуордук, оттон Табаҕаҕа сэдэхтик устар диэн суһал ыстаап иһитиннэрэр.
Өрөспүүбүлүкэтээҕи суһал ыстаап көрдөрүүтүнэн, Нам улууһугар муус хамсаабыт, улуус киинигэр уу таһыма 643 см тэҥнэспит (кутталлаах кирбии 950 см). Алдан өрүс мууһа Тааттаҕа уонна Томпоҕо тиийбит. Бүлүү өрүс мууһа Үөһээ Бүлүүнэн уонна Бүлүүнэн устар. Халыма өрүс мууһа Магадан уобалаһын диэки эстибит. Манна муус хойуутук устар. Амма өрүс мууһа төрдүгэр тахсыбыт. Оттон Оленек өрүс баһыгар муус эстиитэ саҕаламмыт. Яна, Индигирка өрүстэргэ муус ууламмыт, уу таһыма хамсыы турар.
