Томпо улууһунан көччүйэ сылдьар үрүҥ эһэ бу сарсыарда аны Дьэбэрики Хайа бөһүөлэгэр киирдэ.
Муна сылдьар эһэ ыал тэлгэһэтигэр киирэн ыт аһын былдьаан сиэбит уонна отой да тэлгэһэҕэ нуктаан ылбыт. Билигин үрүҥ эһэ бөһүөлэк кытыытыгар сылдьар, олохтоохтор уонна дьаһалта бэйэлэрин күүстэринэн үргүтэ сатыыллар.
"Эһэ бөһүөлэк кытыытыгар сылдьар, олорор дьиэттэн 120 м тэйиччи үүрдүбүт, тута сатаабыппыт номнуо 6 чааһыгар барда, бардамын биллэрэр, саба түһэр, ырдьыгыныыр. Хайдах гыныахпытын билбэккэ олоробут. Үрүҥ эһэ — Кыһыл кинигэҕэ киирбит кыыл, онон өлөрөр табыллыбат. Бу кыыл дьылҕатын өрөспүүбүлүкэ былаастара дойду бырабыыталыстыбатын кытары быһаараллар. Бөһүөлэккэ айылҕа харыстабылын иниспиэктэрэ диэн суох, билигин үс булчут саалаах харабыллыыбыт, бөһүөлэккэ киирбэтин эрэ курдук дьаһанабыт", - диэн Дьэбэрики Хайа бөһүөлэгин баһылыгын эбээһинэһин толорооччу Сергей Крепушин ЯкутияDaily саайтка кэпсээбит. Бөһүөлэк олохтоохторун барыларын сэрэппиттэр, дьиэттэн быгымаҥ диэн буолбут. Бүгүн православнай итэҕэллээхтэр өлбүт дьону саныыр Радоница күнүн бэлиэтииллэр, оттон Дьэбэрики Хайаҕа үрүҥ эһэ кылабыыһаттан 100-чэ миэтирэ сыбыытыырынан, дьоннор кылабыыһаҕа тахсыбакка олороллор. Миэстэтигэр учаскыабай үлэлиир.
