Бу сылга үктэнэн баран, Саха сирин эбэлэрин көмүс хатырыктааҕынан байытыы тэрээһинэ ыам ыйын 27 күнүттэн саҕаланна. Ол курдук АЛРОСА исписэлиистэрэ уонна “Чернышевскайдааҕы балык собуотун” үлэһиттэрэ буолан, күргүөмүнэн тахсан, быйылгы бастакы киэҥ хабааннаах үлэ бастакы түһүмэҕэр Өлүөнэ эбэ киэҥ көҕөрөр дуолугар 842 тыһ. күндүөбэй балык ыаматын ыыттылар.
Өрүү да буоларын курдук алмаас хампаанньатын Экологияҕа киинин үлэһиттэрэ ыытар балыктарын Чернышевскайдааҕы балык собуотуттан ылаллар.
Быйыл Экология киинэ 2 мөл. тахса балык ыаматын балыгы үксэтэр сыаллаах ыытарга суоттаналлар. Ахсаанын элбэтиэхтээх балыктарын иһигэр чыыр курдук сыаналаах үрүҥ балык ыамата эмиэ киирсэр. Быйыл балыгы элбэтэр тэрээһиҥҥэ АЛРОСА 10 мөл. солк. анаабыт.
«2020 сылга биһиги Экологияҕа кииммит өрөспүүбүлүкэ өрүстэрин уонна эбэлэригэр балык ыаматын ыытыыга ылыммыт былаанын толору толорбута. Бу АЛРОСА муҥутуур киэҥ хабааннаах (масштабтаах) үлэтэ этэ. Хампаанньа бу иннинэ наар өрүстэргэ балык ыаматын ыытар эбит буоллаҕына, былырыын аан бастакытын күөлгэ – Үөһээ Бүлүү Тимир Күндэ эбэтигэр – балык ыаматын ыыппыта. Балыктатыы (зарыбление) тэрээһинэ икки түһүмэҕинэн барбыта. Былырыын бу сыалга анаан туттуллубут үп 10 мөл. солк. тахса буолбута», – диир АЛРОСА Экологияҕа киинин салайааччыта Полина Анисимова.
Өйдүүр буолуохтааххыт, алмаас хампаанньата Саха сирин эбэлэрин көмүс хатырыктааҕынан байытарга анаан, Чернышевскайдааҕы балык собуотун кытта бииргэ үлэлэспитэ быданнаата. Ону ааһан, 2019 сылтан бэттэх хампаанньа балыгы үксэтиигэ ыытар үбүлээһинин кээмэйин үс бүк улаатыннаран биэрбитэ. Онон балык ыытыллар эбэлэрин ахсаана, ыытыллар балык көрүҥэ да эбиллэр кыахтаммыта.
Санатар буоллахха, былырыын, эмиэ баччаларга, Чернышевскайдааҕы балык собуотуттан 4 мөл. кэриҥэ хатыыс, чыыр, күндүөбэй, быраҥаатта ыаматын ылан, ыытан турар.
Ити иннинэ АЛРОСА туһааннаах собуокка 6 мөл. солк. үбүлээһини көрбүтүн суотугар ууһатар балыктарын көрүҥэ эбиллибитэ. Чуолаан, чыыр, хатыыс балык. Онон биир мөл. кэриҥэ чыыр балык ыаматын Өлүөнэҕэ, Бүлүүгэ ыыппыттара. Көрүллүбүт үп сороҕо малы-салы саҥардыыга туттуллан, оҥорон таһаарыы хаачыстыбата тупсубута. 2018-2019 сылга диэри собуокка быраҥаатта уонна күндүөбэй эрэ иитиллэрэ. АЛРОСА Бүтүн Арассыыйатааҕы Балык хаһаайыстыбатын билим-чинчийэр институтун Саха сиринээҕи салаатыгар анал чинчийиини ыыттаран, билимҥэ тирэҕирэн, балыгы үксэтии үлэтэ саҕаламмыта. Чыыры уонна хатыыһы эмиэ иитэр көҥүл ылылларын ситиспиттэрэ. Ону кытта тэҥинэн балык ыаматын ыытар өрүстэр, күөл ахсаана эбиллэр кыахтаммыта.
АЛРОСА
