От ыйын 26 түүнүгэр, Алданнааҕы оҕо дьиэтин таһыгар түүн, тыатааҕы биллэн ааспытын тулалыыр түөлбэни кэтээн көрөр видеокамера устубут.
Социальнай ситимнэргэ, шлагбаум таһыгар эһэ сүүрэн ааһара уонна тыаҕа киирэн сүтэн хаалар видеота киэҥник тарҕанна.
Олохтоох киһи кэпсиир: «Киэһэ сөрүүн түһүүтэ биһиги оҕуруоппутугар парниктарбытын саппыппыт уонна олбуор таһыгар туох эрэ сүүрэн ааһар тыаһын истибиппит. Хараҥата бэрт буолан туох кэлэн ааспытын өйдөөбөккө да хаалбыппыт. Сарсыарда билбиппит – тыатааҕы эбит».
Туоһу этэринэн, бу дьиэттэн чугас саньытаарынай туочука баар эбит, онтон чугас 200 миэтэрэ тэйиччи хара тыа саҕаланар. Быһыыта, адьырҕа ол диэкиттэн ыстанан тахсыбыт, уулусса устун оҕо дьиэтин диэки сүүрбүт уонна салгыы нөҥүөлээн атын тыаҕа таласпыт.
Алданнааҕы оҕо дьиэтин үлэһиттэрэ, чахчы эһэ кэлэн барбытын туһунан иһитиннэриини бигэргэттилэр: «Дьолго, хата түүн буолан, биир да оҕо сиэмэх кыыл суолугар түбэспэтэх».
Саха сиринээҕи Айылҕа Харыстабылын министиэристибэтин үлэһиттэрэ, кинилэргэ Алдан оройуонуттан бу түбэлтэ туһунан туох да иһитиннэрии киирэ илик диэтилэр.
Маныаха маарынныыр түбэлтэ, биир ый аннараа өртүгэр Мииринэй оройуонугар Удачнай куоракка бэлиэтэммитэ. Төһө эмэ эһэни куттаан, үргүтэн туран үүрэ сатаабыттарын үрдүнэн адьырҕа кыһамматах. Онон, дьоҥҥо куттал суоһаабатын туһуттан булчуттар кыылы ытарга күһэллибиттэр.
