Үс туоннаҕа диэри ыйааһыннаах массыыналарга көҥүллээх “Хатас-Павловскай” өрүс суола, ахсынньы 6 күнүгэр арыллыан сөп.
Ол туһунан суруналыыстарга кэпсээтэ «Мехдорстрой» ХЭТ кылаабынай инженерэ Станислав Евсеев.
“Бэнидиэнньик күн ГИМС уонна өрөспүүбүлүкэ суолларын салалтатын бэрэстэбиитэллэрин хамыыһыйалара мустуохтаах. Анал суол бэлиэлэрэ турбуттарын кэнниттэн сөптөөх быһаарыы ылыллыахтаах.Өскөтүн хамыыһыйалар уопсай сөбүлэҥҥэ кэллэхтэринэ эбиэттэн киэһэ суол арыллар. Билиҥҥи күн туругунан Хатас өртүттэн муус халыҥа – 40 см, оттон Павловскай өртүттэн – 30 см кэриҥэ”, - диэн чопчулаата Евсеев.
Эбэни туоруур икки ааартыктарынан ыйааһыны хонтуруоллуур пууннар туруохтара. Ыйааһын уйугун улаатыннарыы туһунан боппуруос ахсынньы 10 күнүн кэнниттэн туруоҕа.
