Бэс ыйын 6 күнүгэр СӨ Үрдүкү суута икки киһини өлөрүүгэ уорбаланар (РФ ХК 105 ыст. 2 ч. “а” п.) А.Р. Варфоломеев дьыалатын көрдө. Бу туһунан СӨ Үрдүкү суутун бэрэссэдээтэлин СМИни уонна уопсастыбаннаһы кытары үлэҕэ көмөлөһөөччүтэ Радмила Сюн-Цин-Фан иһитиннэрэр.
Суут быһаарбытынан, сууттанааччы ааспыт сыл атырдьах ыйын 25 күнүгэр Бүлүүлүүр аартык 15 км. баар “Авиатор” СОТка күөл кытылыгар хас да буолан арыгылыы сылдьыбыттар. Үһүө буолан хаалбыттарыгар, Николай Варфоломевка “арыгыга хаһан да кыттыспаккын” диэбитигэр өһүргэнэн, иирсэн турбуттар. Варфоломеев 3-4 м. усталаах мас дуосканы ылбыт да, утарсааччытыгар 19-та этигэр-сиинигэр бүттэтэ суох биэртэлээбит. Ол кэмҥэ үһүстэрэ – Г. Вячеслав тохтото сатаабытын, Варфоломеев ылан дуосканан 24-тэ сырбаппыт. Ол кэннэ, өйө туймаарбыт Вячеславы күөлгэ соһон киллэрэн тимирдибит. Николайы тыынаах дии санаан, эмиэ ууга соһон киллэрбит. Суут-мэдэссиинэ эспэртиисэтэ быһыырбытынан, Николай төбөтүгэр ылбыт эчэйиититтэн өлбүт, оттон Вячеслав ууга чачайбыт.
Сууттанааччы Варфоломеев буруйун толору билиммит, ол эрээри соруйан өлөрөргө санааматаҕын этиммит. Сууттанааччы үрдүкү юридическэй үөрэхтээх, урут уорганнарга үлэлии сылдьыбыт. 2005 сыллаахха дьахтары өлөрөн хаайыыга олорбут, оттон 2011 сыллаахха болдьоҕун иннинэ тахсыбыт. Икки киһини өлөрөн баран, сарсыныгар полицияҕа бэйэтэ кэлэн билиммит.
СӨ Үрдүкү суута А.Р. Варфоломеевы 17 сыл, 2 сыл хааччахтаах оһуобай эрэсиимнээх хаайыыга уураахтаата. Бириигэбэр сокуоннай күүһүгэр киирэ илик.
Сэҥээриилэр