12 сыл анараа өттүгэр Краснодар кыраайын Кущевское станицатыгар 12 киһини өлөрүүгэ кыттыһан уонна да атын буруйу оҥоруунан хаайыллыбыт “Цапки” баанда икки чилиэнэ анал байыаннай дьайыыга кыттыбыттарын иһин босхоломмуттарын туһунан киин СМИ-лэр суруйаллар.
Вячеслав Рябцев уонна Андрей Быков иккиэн сүүрбэлии сыл хаайыыга олоруохтаахтар этэ. Ол гынан баран, 2022 ахсынньытыгар Рябцев “Вагнер” ЧВК-ны кытта хантараак түһэрсэн, анал байыаннай дьайыыга барбыт. Онно тиийэн саба түһэр сэриилэр кэккэлэригэр сулууспалаабыт, бааһырбыт, мэтээлинэн наҕараадаламмыт уонна 2023 сыллаахха сыл аҥаардаах хантараагын болдьоҕо туолан, Краснодарга эргиллэн кэлбит, үлэҕэ киирбит, ыал буолбут. Санаттахха, Рябцев бастакы ойоҕо баанда тутуллаатын кытта эриттэн арахсыбыта.
Баанда иккис чилиэнэ Андрей Быков 2023 сыл балаҕан ыйыгар РФ Оборуонаҕа министиэристибэтин кытта хантараак түһэрсэн, байыаннай дьайыы буола турар сиригэр барбыт уонна икки ый буолаат, бааһыран Донецкай госпиталыгар киирбит. Билигин даҕаны эмтэнэ сытар дииллэр.
Кинилэри таһынан анал байыаннай дьайыыга ОПГ өссө биир чилиэнэ, үйэтин тухары хаайыыга ууруллубут Владимир Алексеев бара сатаабыта. Ол гынан баран, көҥүл ылбатаҕа.
Санатар эбит буоллахха, “Цапки” бөлөх кыттыылаахтара уонтан тахса сыл устата Краснодар кыраайын Кущевская станицатын түүрэйдээн-мөрөйдөөн, талбыттарынан дьаһайан, “күн-ый” буолан олорбуттара. Итинник баанда баара кинилэр биир күн иһигэр биир бааһынай дьиэтигэр киирэн 12 киһи сидьиҥник өлөрбүттэрин кэннэ биллибитэ. Ол иһигэр 8 улахан киһини кытта 4 оҕону.
