ИДьМ Уус Алданнааҕы салаата муниципальнай бүддьүөт тэрилтэтин икки дуоһунастааҕар тэрилтэ харчытын уоран сиэбиттэригэр уорбалаан, Арассыыйа ХК 159 ыст. 3 ч. дьыаланы көбүттэ.
Барыллаан силиэстийэ быһаарбытынан, 54 саастаах тэрилтэ кылаабынай буҕаалтыра уонна 33 саастаах буҕаалтыр кыыс тэрилтэ салайааччытын эрэбилин аһара түһэн, сулууспалаах балаһыанньаларын туһанан, 2017-2019 сс. сымыйа платежкалары ыыта-ыыта уонна сымыйаннан хамнас ааҕа-ааҕа тус сыалларыгар туһанаары, бүддьүөт харчытын иҥэриммиттэр.
Инньэ гынан, бүддьүөккэ 1,5 мөл. солк. хоромньу оҥоһуллубут. Холуобунай дьыала салгыы силиэстийэлэнэр.
